काठमाडौं । नेपाली कांग्रेसले भीष्मराज आङदेम्बेलाई संसदीय दलको नेता बनाउने भएको छ। उपसभापति विश्वप्रकाश शर्मा नेतृत्वको समितिले संसदीय दल नेताका लागि आङ्देम्बेको नाममा सहमति जुटाएसंगै कांग्रेस संसदीयदलले आङदेम्बेलाई दलको नेता चयन गर्ने निश्चित भएको हो ।
पूर्वसहमहामन्त्री अर्जननरसिंह केसीले दलको नेताको दाबी छाडेर आफु प्रतिस्पर्धामा नरहेको बताएपछि आङ्देम्बेको नाममा सर्वसम्मित भएको बताइएको छ ।
केसीका साथै सांसदहरू मोहन आचार्य, बास्ना थापा, निस्कल राई, फिर्दोष आलाम र चन्द्रमोहन यादवलगायतले दलको नेतामा दाबी गरेका थिए।
आङदेम्बे पार्टीको पूर्वसहमहामन्त्री तथा समानुपातिक सांसद हुन्। उनी पार्टीको १४ औं महाधिवेशनमा देउवा पक्षबाट सहमहामन्त्री निर्वाचित भएका थिए । एकताको सन्देश दिनका लागि पनि आङ्देम्बेलाई दलको नेता बनाउनुपर्ने आवाज कांग्रेसभित्र उठ्दै आएको छ ।
गगन थापालाई सभापति चयन गरेको विशेष महाधिवेशनमा भने आङदेम्बे सहभागी भएका थिएनन् । यद्यपि, उनले आफूलाई कुनै समूहको लेबल नलगाउन र आफू सभापति थापाको स्पिरिट अनुसार काम गर्न तयार रहेको भन्दै फेसबुक स्टाटस लेखेका थिए ।
आज बसेको केन्द्रीय कार्यसम्पादन समिति बैठकमा सभापति गगन थापाले आङदेम्बेका नाम सर्वसम्मतका लागि पेश गर्नेछन्।
केन्द्रीय कार्यसम्पादन समितिबाट अनुमोदन भएपछि आज दिउँसो १ बजे कांग्रेस संसदीय दलको कार्यालयमा बस्ने दलको बैठकले नेता चयन गर्नेछ। कांग्रेस कार्यवाहक मुख्यसचिव कृष्णप्रसाद दुलालले दलको नेता सहमति जुटेको पुष्टी गरे।
देउवा र थापा पक्षसँग समदुरीको सम्बन्धमा बसेका आङदेम्बे संसदको पहिलो बैठकमा बोल्दा भने थापाको पक्षमा प्रष्ट उभिएका थिए।
प्रतिक्रिया