बुटवल । पूर्व-पश्चिम राजमार्ग अन्तर्गत रूपन्देहीको सैनामैनास्थित घमाहा खोलामा रहेको पुल भासिँदा सवारी आवागमन प्रभावित भएको छ । सैनामैना नगरपालिका-५ मा पर्ने उक्त पुल मंगलबार दिउँसो भासिएको हो । पुल भासिएपछि प्रहरीले सवारी साधनलाई वैकल्पिक मार्ग प्रयोग गर्न आग्रह गरेको छ ।
इलाका प्रहरी कार्यालय बुटवलका प्रमुख डीएसपी निशान्त श्रीवास्तवका अनुसार निर्माणाधीन सडक खण्डमा रहेको पुल भासिँदा आवागमनमा समस्या उत्पन्न भएको हो । उनले पुल मर्मतमा ३ दिनदेखि एक सातासम्म लाग्न सक्ने जानकारी दिए ।
विकल्पका रूपमा सैनामैना-४ स्थित लुम्बिनी रोडको कुश्मा हुँदै बक्सडाँडा भएर अगाडि कलौनी जोड्ने करिब ३ किलोमिटर लामो डाइभर्सन तयार गरिएको छ ।
बुटवल-गोरुसिंगे ५० किलोमिटर सडक विस्तारको क्रममा रहेकोले यसअघि नै सडकमा खाल्डाखुल्डी र अवरोधका कारण यात्रुहरूले सास्ती भोग्दै आएका छन् ।
हाल पूर्वबाट पश्चिमतर्फ जाने सवारीहरू बुटवल-भैरहवा-लुम्बिनी-तौलिहवा हुँदै गोरुसिंगे निस्कने गरेका छन् भने पश्चिमबाट पूर्वतर्फ आउने सवारीहरू गोरुसिंगे-तौलिहवा-लुम्बिनी-भैरहवा हुँदै आवागमन गरिरहेका छन् ।
प्रतिक्रिया