काठमाडौं । मुलुकको पश्चिमी क्षेत्र आसपास रहेको न्यूनचापीय प्रणाली र स्थानीय वायुको प्रभावका कारण देशका विभिन्न क्षेत्रमा वर्षा तथा केही स्थानमा गर्मी बढ्ने सम्भावना रहेको छ ।
जल तथा मौसम पूर्वानुमान महाशाखाका अनुसार हाल गण्डकी र कर्णाली प्रदेशका हिमाली तथा पहाडी भूभागमा सामान्यदेखि पूर्ण बदली रहेको छ भने अन्य पहाडी क्षेत्रमा आंशिक बदली र तराईका अधिकांश स्थानमा मौसम मुख्यतः सफा रहेको छ । कोशी, बागमती, गण्डकी, लुम्बिनी, कर्णाली तथा सुदूरपश्चिम प्रदेशका हिमाली र पहाडी क्षेत्रका केही स्थानमा हल्का वर्षा भइरहेको छ ।
महाशाखाका अनुसार आज दिउँसो देशका हिमाली तथा पहाडी भूभागमा सामान्यतया बदली रहनेछ भने तराई क्षेत्रमा आंशिक बदली रहनेछ । हिमाली तथा पहाडी क्षेत्रका केही स्थान तथा मधेस र कोशी प्रदेशका तराईका एक-दुई स्थानमा मेघगर्जन र चट्याङसहित मध्यम वर्षाको सम्भावना रहेको छ । उच्च हिमाली क्षेत्रमा हल्का हिमपातसमेत हुन सक्ने अनुमान गरिएको छ ।
त्यसैगरी, मधेस, कोशी, बागमती र गण्डकी प्रदेशका तराई क्षेत्रमा तापक्रम बढ्ने सम्भावना रहेकाले गर्मीको प्रभाव थप बढ्न सक्ने महाशाखाले जनाएको छ ।
आज राति हिमाली भूभागमा सामान्यतया बदली रहने, पहाडी भूभाग तथा मधेस र कोशी प्रदेशका तराई क्षेत्रमा आंशिक बदली रहने तथा बाँकी तराई क्षेत्रमा मौसम मुख्यतः सफा रहने पूर्वानुमान गरिएको छ । कोशी, मधेस र बागमती प्रदेशका हिमाली तथा पहाडी भूभागका केही स्थान तथा गण्डकी र कर्णाली प्रदेशका हिमाली क्षेत्रमा हल्का वर्षा वा हिमपात हुन सक्ने सम्भावना छ ।
महाशाखाले लुम्बिनी र सुदूरपश्चिम प्रदेशका तराईका एक-दुई स्थानमा पनि मेघगर्जन तथा चट्याङसहित वर्षा हुन सक्ने जनाएको छ ।
मौसमविद्हरूले विशेषगरी मधेस र कोशी प्रदेशका तराई क्षेत्रमा तापक्रम बढ्ने भएकाले आवश्यक सतर्कता अपनाउन तथा मौसमसम्बन्धी अद्यावधिक सूचनामा ध्यान दिन आग्रह गरेका छन् ।
प्रतिक्रिया