बुटवल । बुटवल-१५ ढवाहास्थित वेस्टर्न मेगा कलेजले कक्षा १२ को परीक्षा दिएर बसेका विद्यार्थीहरूलाई लक्षित गर्दै ३० दिने निःशुल्क सीपमूलक हस्पिटालिटी तालिम सञ्चालन गरेको छ ।
तालिममा रुपन्देही जिल्लाका विभिन्न विद्यालयका करिब ८० जना विद्यार्थी सहभागी भएका छन् । विद्यार्थीहरूलाई व्यावसायिक सीप प्रदान गर्ने उद्देश्यले बेकरी एण्ड किचन, बारिस्टा तथा एफ एण्ड बी सर्भिस, र गेष्ट ह्याण्डलिङ एण्ड हाउसकिपिङ गरी तीन विधामा प्रशिक्षण दिइँदैछ ।
विद्यार्थीहरूको फुर्सदको समयलाई सदुपयोग गर्दै आत्मनिर्भर तथा रोजगारमुखी बनाउन तालिम आयोजना गरिएको कलेजले जनाएको छ । कलेजका प्राचार्य अधिवक्ता किशु शर्माले सहभागीहरूका लागि निःशुल्क दर्ता, निःशुल्क प्रशिक्षण तथा तालिम सम्पन्न भएपछि निःशुल्क प्रमाणपत्रको व्यवस्था गरिएको जानकारी दिए ।
बिएचएम संयोजक तथा सेफ विकास खत्रीका अनुसार तालिम दैनिक बिहान ११ बजेदेखि साँझ ५ बजेसम्म सञ्चालन हुनेछ । सहभागी विद्यार्थीहरूका लागि अतिरिक्त सुविधाका रूपमा निःशुल्क स्विमिङको समेत व्यवस्था गरिएको छ ।
सन् २०१३ देखि गुणस्तरीय शिक्षा प्रदान गर्दै आएको वेस्टर्न मेगा कलेजले अन्तर्राष्ट्रिय सम्बन्धन प्राप्त कार्यक्रममार्फत व्यावहारिक तथा सीपमूलक शिक्षा उपलब्ध गराउँदै आएको जनाएको छ । कलेजले विद्यार्थीहरूलाई राष्ट्रिय तथा अन्तर्राष्ट्रिय रोजगार बजारका लागि दक्ष जनशक्ति उत्पादन गर्ने लक्ष्यका साथ विभिन्न कार्यक्रम सञ्चालन गरिरहेको छ ।
कलेजमा हाल स्नातक तहअन्तर्गत चारवर्षे बीआईटी र बीएचएम तथा स्नातकोत्तर तहअन्तर्गत दुईवर्षे एमबीए कार्यक्रम सञ्चालनमा रहेका छन् । कलेजले शैक्षिक सत्र २०८३ का लागि भर्ना खुला भएको जानकारी पनि दिएको छ ।
प्रतिक्रिया