काठमाडौं । राष्ट्रिय विपद् जोखिम न्यूनीकरण तथा व्यवस्थापन प्राधिकरणले आगामी दुई दिन देशका विभिन्न क्षेत्रमा भारी वर्षाको सम्भावना रहेकाले उच्च सतर्कता अपनाउन सर्वसाधारणलाई आग्रह गरेको छ ।
प्राधिकरणका अनुसार शनिबार र आइतबार कोशी, गण्डकी, लुम्बिनी तथा सुदूरपश्चिम प्रदेशका पहाडी तथा तराई भू-भागका केही स्थानमा अति भारी वर्षा हुन सक्ने सम्भावना रहेको छ । लगातारको वर्षासँगै बाढी, पहिरो, भू-क्षय, कटान, गेग्रान बहाव तथा डुबानको जोखिम बढेकाले आवश्यक सावधानी अपनाउन आग्रह गरिएको हो ।
प्राधिकरणले पाँचथर, इलाम, झापा, संखुवासभा, तेह्रथुम, भोजपुर, खोटाङ, धनकुटा, सिन्धुली, ललितपुर, काभ्रेपलाञ्चोक, सिन्धुपाल्चोक, नुवाकोट, चितवन, धादिङ, गोरखा, लमजुङ, कास्की, तनहुँ, पर्वत, बागलुङ, म्याग्दी र स्याङ्जासहित २३ जिल्लालाई उच्च जोखिमयुक्त क्षेत्रका रूपमा पहिचान गरेको छ ।
उच्च जोखिम रहेका जिल्लाहरूमा विशेषगरी रातिको समयमा सवारी साधन सञ्चालन नगर्न तथा यात्रा गर्दा आवश्यक सतर्कता अपनाउन प्राधिकरणले अनुरोध गरेको छ । मौसम र जोखिमको अवस्थाअनुसार जुनसुकै बेला सवारी आवागमन बन्द गर्नुपर्ने अवस्था आउन सक्ने जनाइएको छ ।
जल तथा मौसम विज्ञान विभागका अनुसार देशका हिमाली तथा पहाडी भू-भागका केही स्थान, कोशी, बागमती, लुम्बिनी र सुदूरपश्चिम प्रदेशका तराई क्षेत्रका थोरै स्थान तथा मधेश, बागमती र गण्डकी प्रदेशका केही तराई क्षेत्रमा भारीदेखि अति भारी वर्षाको सम्भावना रहेको छ ।
प्राधिकरणले नदी तथा खोला आसपास, पहिरोको जोखिम भएका बस्ती र डुबान प्रभावित क्षेत्रका बासिन्दालाई विशेष सतर्कता अपनाउन आग्रह गरेको छ । साथै, स्थानीय प्रशासन र सुरक्षा निकायबाट जारी हुने सूचनालाई निरन्तर पालना गर्न पनि अनुरोध गरिएको छ ।
यसैबीच, मौसम पूर्वानुमान महाशाखाले पनि विशेष बुलेटिन जारी गर्दै आगामी दुई दिन मौसमजन्य विपद्को जोखिम उच्च रहने भएकाले आवश्यक पूर्वतयारी र सावधानी अपनाउन आग्रह गरेको छ ।
प्रतिक्रिया