काठमाडौं । बुटवल घर भई नारायणगढमा व्यवसाय सञ्चालन गर्दै आएका अभि घिमिरेलाई सांसद खुस्बु ओलीलाई सामाजिक सञ्जाल फेसबुकमार्फत धम्की दिने तथा चरित्रहत्या गर्ने उद्देश्यले सामग्री प्रकाशित गरेको आरोपमा प्रहरीले पक्राउ गरेको छ ।
जिल्ला प्रहरी कार्यालय चितवनका अनुसार घिमिरेसँगै भरतपुर-१६ निवासी तेजेन्द्रप्रसाद पौडेललाई पनि पक्राउ गरिएको छ । पौडेल राष्ट्रिय स्वतन्त्र पार्टी (रास्वपा)का कार्यकर्ता रहेको प्रहरीले जनाएको छ ।
सांसद ओलीले काठमाडौंमा साइबर अपराधसम्बन्धी उजुरी दिएपछि नेपाल प्रहरीको साइबर ब्युरोले अनुसन्धान गरी उनीहरूको पहिचान गरेको थियो । त्यसपछि थप अनुसन्धानका लागि मुद्दा चितवन पठाइएपछि दुवै जनालाई पक्राउ गरिएको प्रहरीले जनाएको छ ।
पक्राउ परेका दुवै जनाविरुद्ध विद्युतीय कारोबार ऐनअन्तर्गत म्याद थप गरी थप अनुसन्धान तथा कानुनी प्रक्रिया अघि बढाइएको जिल्ला प्रहरी कार्यालय चितवनले जनाएको छ ।
प्रतिक्रिया