साताको पहिलो कारोबारमै नेप्से ३३ अंकले ओरालो, ६ अर्बभन्दा बढीको कारोबार

काठमाडौं । साताको पहिलो कारोबार दिन आइतबार नेपाल स्टक एक्सचेन्ज (नेप्से) दोहोरो अंकले घटेको छ। बजार परिसूचक नेप्से ३३.२८ अंकले घटेर २,७०१.३२ विन्दुमा झरेको हो।

आजको कारोबारमा अधिकांश कम्पनीको सेयर मूल्य घटेको छ। कुल कारोबार भएका कम्पनीमध्ये ३५ कम्पनीको सेयर मूल्य बढ्दा २३५ कम्पनीको मूल्य घटेको छ भने पाँच कम्पनीको सेयर मूल्य स्थिर रहेको नेप्सेले जनाएको छ।

दिनभरमा ६ अर्ब ७ करोड १८ लाख ४४ हजार रुपैयाँ बराबरको सेयर कारोबार भएको छ। यस अवधिमा एक करोड ३९ लाख १३ हजार ७७० कित्ता सेयर ६९ हजार ७१५ पटक किनबेच भएका छन्।

कारोबारका क्रममा एभरेष्ट कलर लिमिटेडको सेयर मूल्यमा सकारात्मक सर्किट लागेको छ। त्यस्तै गरिमा समृद्धि योजना, सानिमा बैंक डिबेन्चर, गुर्खाज फाइनान्स र एनएमबी बैंक डिबेन्चर उच्च प्रतिफल दिने कम्पनीहरूको सूचीमा परेका छन्।

समूहगत परिसूचकतर्फ बैंकिङ र म्युचुअल फन्डबाहेक सबै उपसमूह राताम्मे बनेका छन्। बजारमा अधिकांश क्षेत्रको गिरावटका कारण समग्र नेप्से परिसूचकमा दबाब परेको विश्लेषण गरिएको छ।