चितवन । कोरोना भाइरसको संक्रमणका कारण चितवनमा एक जना वडाअध्यक्षको मृत्यु भएको छ ।
भरतपुर महानगरपालिका वडा नं. २० का वडाअध्यक्ष मणिलाल तामाङको कोरोना संक्रमणबाट मृत्यु भएको हो ।
भरतपुर अस्पतालमा उपचारको क्रममा आइतबार बिहान ११ः३० बजे वडाअध्यक्ष तामाङको मृत्यु भएको अस्पतालका कोभिड–१९ क्लिनिकका संयोजक डा. प्रमोद पौडेलले जानकारी दिएका छन् ।
उच्च ज्वरो, खोकी र श्वासप्रश्वासमा समस्या देखिएपछि यही असोज २३ गते ६९ वर्षीय तामाङलाई अस्पताल भर्ना गरिएको थियो।
त्यसअघि असोज १४ गते नै उनको पीसीआर परीक्षण गर्दा कोरोना पोजेटिभ देखिएको थियो ।
घरमै बसेका उनलाई स्वाश्वप्रसावमा समस्या आएपछि अस्पताल ल्याइएको थियो । अस्पताल ल्याउँदा अक्सिजन लेभल जम्मा ४० रहेको अस्पतालले जनाएको छ ।
आईसीयूमा राखेर भेन्टिलेटरको सहायतामा उपचार गर्दागर्दै उनको निधन भएको अस्पतालले जनाएको छ ।
वडाअध्यक्ष तामाङलाई मधुमेह, उच्च रक्तचापको समस्या रहेको थियो ।
तामाङ गत स्थानीय निर्वाचनमा नेपाली काँग्रेसका तर्फबाट वडाअध्यक्ष पदमा निर्वाचित भएका थिए।
प्रतिक्रिया