जनकपुरधाम । नेपाल र भारतका सुरक्षा अधिकारीबीच सीमा सुरक्षा तथा व्यवस्थापनलाई थप प्रभावकारी बनाउने विषयमा समन्वयात्मक बैठक सम्पन्न भएको छ।
महोत्तरीको जलेश्वरमा शनिबार सम्पन्न बैठकमा सीमा क्षेत्रमा हुने अपराध नियन्त्रणका लागि संयुक्त गस्ती विस्तारसँगै विशेष सूचना आदानप्रदान टोली गठन गर्ने सहमति भएको हो।
बैठकमा सहभागी महोत्तरीका प्रमुख जिल्ला अधिकारी इन्द्रदेव यादवका अनुसार दुवै देशका सुरक्षाकर्मीले गर्दै आएको संयुक्त गस्तीलाई थप क्षेत्रमा विस्तार गर्ने र सीमा क्षेत्रमा हुने आपराधिक गतिविधिबारे तत्काल सूचना आदानप्रदान गर्ने विषयमा सहमति भएको छ।
बैठकमा सीमा अपराध नियन्त्रण तथा रोकथाम, लागूऔषधको ओसारपसार नियन्त्रण, सीमा स्तम्भको सुरक्षा तथा मर्मत, अवैध हातहतियारको ओसारपसार नियन्त्रण र सीमामा हुने अन्य आपराधिक गतिविधिका विषयमा छलफल भएको यादवले जानकारी दिए।
भारतको सीतामढीका जिल्ला मजिस्ट्रेट तनय सुलतानियाले दुवै देशका सुरक्षा निकायबीच प्रभावकारी समन्वय गरी सीमामा हुने आपराधिक गतिविधि नियन्त्रण गर्ने सहमति भएको बताए। उनले यसबाट आगामी दिनमा सीमा सुरक्षा व्यवस्था थप सुदृढ हुने विश्वास व्यक्त गरे।
सुलतानियाका अनुसार लागूऔषध नियन्त्रण, मानव तस्करी, सीमा सुरक्षा, सीमा स्तम्भको मर्मतसम्भार, बाढी नियन्त्रणलगायतका विषयमा पनि बैठकमा छलफल भएको थियो। विशेषगरी लागूऔषध नियन्त्रण र सुरक्षा सम्बन्धी सूचना छिटो आदानप्रदान गर्न विशेष टोली गठन गर्ने विषयमा सहमति भएको उनले बताए।
महोत्तरीका प्रमुख जिल्ला अधिकारी यादवको अध्यक्षतामा भएको बैठकमा सर्लाहीका प्रमुख जिल्ला अधिकारी विजयराज सुवेदी, रौतहटका प्रमुख जिल्ला अधिकारी दिनेस सागर, सीतामढीका जिल्ला मजिस्ट्रेट तनय सुलतानिया र सीतामढीका प्रहरी उपरीक्षक अमित रञ्जनलगायत नेपाल र भारतका सुरक्षा अधिकारीहरूको सहभागिता थियो।
प्रतिक्रिया