काठमाडौं । भोटेकोशी बाढी तथा अविरल वर्षाका कारण पहिरो खस्दा देशका विभिन्न राजमार्ग तथा सडकखण्ड अवरुद्ध भएका छन् ।
प्रहरी प्रधान कार्यालयका अनुसार पृथ्वीराजमार्गअन्तर्गत धादिङको बेनिघाट रोराङ गाउँपालिका-७ स्थित कृष्णभीरमा त्रिशूली नदीले सडक कटान गरेपछि सडक भासिएर यातायात तथा मानिसको आवतजावतसमेत पूर्ण रूपमा बन्द भएको छ ।
त्यस्तै, धादिङकै गजुरी गाउँपालिका-२ स्थित परेवा भीरमा बाढीका कारण सडकको तल्लो भाग भासिएपछि सडकखण्ड पूर्ण रूपमा अवरुद्ध भएको प्रहरीले जनाएको छ ।
अविरल वर्षाका कारण मुगुबाट गमगढीतर्फ जाने सडकसमेत अवरुद्ध भएको छ । ओखलढुङ्गामा सिद्धिचरण लोकमार्गअन्तर्गत मानेभञ्ज्याङ गाउँपालिका-६ र ७ जोड्ने सडक पनि अवरुद्ध भएको छ ।
यसैगरी, लमजुङको मर्स्याङ्दी गाउँपालिका-४ श्रीचौरस्थित बेँसीसहर-मनाङ सडकखण्ड पनि पूर्ण रूपमा अवरुद्ध रहेको प्रहरी प्रधान कार्यालयले जनाएको छ ।
लगातारको वर्षा र बाढीका कारण सडक भासिने तथा पहिरो खस्ने क्रम बढेकाले विभिन्न स्थानमा यातायात प्रभावित भएको प्रहरीले जनाएको छ ।
प्रतिक्रिया