सुर्खेत । गत शुक्रबार डोल्पा जिल्ला कारागारबाट सुरुङ खनेर फरार भएको प्रकरणको छानबिन गर्न बनेको टोलिसँगै कर्णाली प्रदेश प्रहरी प्रमुख प्रहरी नायब महानिरीक्षक जयराज सापकोटा मंगलबार डोल्पा पुगेका छन् ।
उनीसहित डोल्पामा केन्द्रीय छानविन टोलीसमेत पुगेर अनुसन्धान थालेको प्रदेश प्रहरी कार्यालय सुर्खेतका एसएसपी सन्तोषसिंह राठौरले जनाकारी दिए ।
‘कर्णाली प्रदेश कार्यालय नेपालगन्जका एसएसपी राजीव बस्नेतको नेतृत्वमा छानविन टोली गठन भएको थियो । उक्त टोली पनि आजै डोल्पा पुगेर आवश्यक अनुसन्धान गर्न सुरु गरेको छ,’ उनले भने, ‘कारागारको सुरक्षा व्यवस्थापन, कैदीबन्दी फरार हुनुअघिको अवस्था, सुरक्षाकर्मीको जिम्मेवारी र निगरानीमा भएको कमजोरीबारे स्थलगत अध्ययन गर्नेछ ।’
शुक्रबार राति ५ जना जबर्जस्ती करणी र ३ जना चोरी मुद्दाका कैदीले करिब चार मिटर लामो सुरुङ खनेर भागेका थिए । भागेका कैदीमध्ये दुईजना आजै रुकुममा फेला परेका छन् । अझै ६ फेला पर्न सकेका छैनन् ।
पक्राउ पर्नेमा रुकुम पश्चिम आठबिसकोट नपा १० घर भएको जर्वजस्ती करणी मुद्दाका अभियुक्त ३२ वर्षीया रामबहादुर बिक र सल्यान जिल्लाको कुमाख गापा-५ घर भएका जर्वजस्तीकरणी कसुरमा कारागारमा रहेका २८ वर्षको रेशम राना छन् । अझै ६ जना फरार छन् ।
प्रतिक्रिया