काठमाडौं । नेपाल कम्युनिष्ट पार्टी (नेकपा) भित्र आन्तरिक विवाद उत्कर्षमा पुगेको बेला पार्टीका अध्यक्ष समेत रहेका प्रधानमन्त्री केपी ओलीले मुलुकका चारवटै सुरक्षा निकायका प्रमुखहरुलाई प्रधानमन्त्री निवासमा बोलाएर झण्डै एक घण्टा छलफल गरेका छन् ।
प्रधानमन्त्री निवास बालुवाटारमा नेपाली सेनाका प्रधानसेनापति पूर्णचन्द्र थापा, प्रहरी महानिरीक्षक शैलेश थापा क्षेत्री, सशस्त्र प्रहरी महानिरीक्षक शैलेन्द्र खनाल र राष्ट्रिय अनुसन्धान विभागका प्रमुख गणेश अधिकारीसँग प्रधानमन्त्री ओलीले सामूहिक छलफल गरेका हुन् ।
एक घण्टा बढी छलफल गरेर सुरक्षा निकायका प्रमुखहरु बालुवाटारबाट बाहिरिएपनि अहिलेसम्म छलफलको बिषयमा कसैले सार्वजानिक गरेको छैन । छलफलका बिषयमा सुरक्षा निकायसहित प्रधानमन्त्री निवास श्रोतले पनि बोल्न अस्विकार गरेको छ ।
प्रधानमन्त्री सचिवालयले पछिल्ला सुरक्षा अवस्थाबारे छलफल गर्ने नियमित भेटवार्ता मात्रै भनेको छ ।
पार्टीभित्र विवाद उत्सर्गमा पुगेका बेला प्रधानमन्त्रीले राष्ट्रपति र सुरक्षा प्रमुखहरु सहित आफु निकट नेताहरुसँगको भेटवार्तालाई तिब्र पारेका छन् ।
आजको सुरक्षा प्रमुखहरुसँगको भेटवार्तालाई पनि राजनीतिक वृत्तमा अर्थपूर्ण रूपमा हेरिएको छ ।
प्रतिक्रिया