बुटवल । दोस्रो पटक अर्थमन्त्री बनेपछि पहिलो पटक गृह जिल्ला रुपन्देही पुगेको अर्थमन्त्री विष्णु पौडेललाई काँग्रेस कार्यकर्ताहरुले कालो झण्डा देखाएका छन् ।
काँग्रेको भातृ संगठनहरु नेपाल तरुण दल र नेपाल विद्यार्थी संघ रुपन्देहीले नेपाल कम्युनिस्ट पार्टी (नेकपा)का महासचिव समेत रहेका अर्थमन्त्री पौडेललाई बुटवलमा कालोझण्डा देखाएका हुन् ।
लुम्बिनी प्रदेशको राजधानी मन्त्रीपदसँग साटेको भन्दै उनीहरुले बुटवलको पुरानो बसपार्क (नेपालगञ्जरोड)मा कालोझण्डा देखाएका हुन् ।
बिहानै सैनामैनाका बिभिन्न कार्यक्रममा सहभागी हुन त्यतातर्फ जाँदै गरेको अवस्थामा काँग्रेस कार्यकर्ताहरुले कालो झण्डा प्रदर्शन गर्दै पौडेल बिरुद्ध नारा लगाएका थिए । प्रदर्शनमा सहभागिहरुले पौडेलले अर्थमन्त्री पदसँग प्रदेशको राजधानी साटेको आरोप लगाएका थिए ।
मंगलबार रुपन्देही आएका महासचिब पौडेल रुपन्देहीमा २ दिन बिभिन्न कार्यक्रममा सहभागि हुदैछन् ।
पौडेलको सुरक्षामा बाक्लो संख्यामा सुरक्षाकर्मी परिचालन गरिएपनि काँग्रेस कार्यकर्ताहरुले सुरक्षाघेरा छिचोल्दै कालो झण्डा प्रदर्शन गरेका थिए ।
प्रदेशको राजधानी सार्न गरिएको षड्यन्त्र विरुद्ध पौडेलले देखाएको मौनताका विरोधमा कालो भण्डा प्रदर्शन गरिएको नेपाली काँग्रेस बुटवल उपमहानगरका नगर सभापति खेलराज पाण्डेले बताए ।
प्रतिक्रिया