काठमाडौं । सत्तारुढ नेपाल कम्युनिष्ट पार्टी (नेकपा)का प्रचण्ड-नेपाल पक्षीय सांसदहरुले संसद अधिवेशन अबिलम्ब बोलाउन माग गरेका छन् ।
संघीय संसदको लोत्से हलमा संसदको दुबै सदनका ११४ जना सांसदहरुको भेलाले संविधानअनुसार अबिलम्ब संसद अधिवेशन आह्वान गर्न माग गरेको हो ।
भेलाले आफ्नो पार्टीको संसदीय दलका प्रमुख एवं प्रधानमन्त्री केपी शर्मा ओलीले असंवैधानिक एवं अलोकतान्त्रिक तरिकाले संसद विघटन गरेको भन्दै त्यसलाई अस्वीकार गर्ने निर्णय गरेको छ ।
भेलालाई सम्बोधन गर्दै पार्टी अध्यक्ष पुष्पकमल दाहाल प्रचण्डले सांसदहरु कोही पनि नमरेको जिकिर गरे । प्रचण्डले संसद र सांसदहरु जीवितै रहेको बताउँदै केही साथीहरुले मर्नका लागि प्रयत्न गरेको धारणा राखेका थिए । अध्यक्ष प्रचण्डले संविधानअनुसार संसद अधिवेशन बोलाइनुपर्ने धारणा समेत राखेका थिए ।
भेलालाई वरिष्ठ नेता माधवकुमार नेपाल र झलनाथ खनालले समेत सम्बोधन गरेका थिए ।
भेलामा प्रतिनिधिसभाका ९० जना र राष्ट्रिय सभाका २४ जना सांसदहरु सहभागि थिए ।
प्रतिक्रिया