काठमाडौं । भारतले अनुदानमा दिएको कोरोना भाइरस विरुद्धको खोप नेपाल आइपुगेको छ ।
भारतको सिरम इन्स्टिच्युट अफ इन्डियाले उत्पादन गरेको कोभिसिल्ड खोप एयर इन्डियाको विमानमार्फत नेपाल आइपुगेको हो । स्वास्थ्य मन्त्रालयल र भारतीय दूतावासले बुधबार मात्रै पत्रकार सम्मेलन गरी अनुदानको खोप बिहीबार आइपुग्ने जानकारी गराएका थिए ।
त्रिभुवन अन्तराष्ट्रिय विमानस्थलमा सो खोप भारतले नेपाललाई हस्तान्तरण गरेको छ ।
टेकुस्थित राष्ट्रिय प्रयोगशालाको भण्डारण कक्षमा तीन चार दिन राखेर सातै प्रदेशमा वितरण गर्ने योजना रहेको स्वास्थ्य तथा जनसंख्या मन्त्रालयले जनाएको छ । खोप वितरणको जिम्मा स्वास्थ्य सेवा विभागले लिएको छ ।
भारतले दिएको खोप फ्रन्टलाईनमा खटिएका ४ लाख मानिसलाई लगाउने सरकारको तयारी छ। फ्रन्टलाइनमा खटिने सुरक्षाकर्मी, स्वास्थ्यकर्मी, सफाइकर्मी, एम्बुलेन्स चालकहरूले पहिलो चरणमा सो खोप लगाउने छन् । दुई डोज लगाउनुपर्ने सो खोप २१ दिनको फरकमा लगाइने मन्त्रालयले जनाएको छ ।
भारतले खोप कुटनीतिअन्तर्गत आफ्ना छिमेकीलाई अनुदानमा खोप वितरण गरेको छ । मालदिभ्स, बंगलादेश, नेपाल र भुटानले अनुदानमा खोप प्राप्त गरेका छन् ।
प्रतिक्रिया