काठमाडौं । प्रचण्ड-नेपाल नेतृत्वको नेपाल कम्युनिष्ट पाटी नेकपाले निर्वाचन आयोग पुगेर पार्टी र चुनाव चिह्नको आधिकारिकता दाबी पेस गरेको छ ।
अध्यक्षद्वय पुष्पकमल दाहाल प्रचण्ड र माधवकुमार नेपालसहितका नेताहरु आयोग पुगेर राजनीतिक दलसम्बन्धी ऐनको दफा ४४ अनुसार आफ्नो दाबी पेस गरेका हुन् ।
त्यसक्रममा नेकपाका नेताहरुले प्रमुख निर्वाचन आयुक्त र आयुक्तहरुसहितका पदाधिकारीसँग राजनीतक दलको विवादको अधिकारिकता टुंगो नलगाई निर्वाचन हुन नसक्ने समेत जिकिर गरेका छन् ।
छलफलमा सहभागी वरिष्ठ नेता झलनाथ खनालले ४४१ सदस्यीय केन्द्रीय कमिटीको झन्डै ७० प्रतिशत सदस्य आफूहरुसँग रहेको दाबी गरेको बताए । खनालले केन्द्रीय कमिटी बैठकबाट प्रमाणित तथ्य, प्रमाण र विधानको व्यवस्था समेटेर दाबी आयोगसमक्ष प्रस्तुत गरेको जानकारी दिए ।
‘बहुदलीय संसदीय व्यवस्थामा दलहरुको बारेमा विवाद निरुपण नभई कुनै चुनाव हुँदैन,’ खनालले भने, ‘दलहरु नै निर्वाचनका मुख्य खेलाडी हुन्, यिनलाई पन्छाएर निर्वाचन हुँदैन’ खनालले भने ।
प्रतिक्रिया