काठमाडौं । भारतमा एकजना प्रदेशमन्त्रीमाथि पेट्रोल बम प्रहार भएको छ । पश्चिम बंगाल राज्यका श्रम मन्त्री जाकिर हुसेनमाथि पेट्रोल बम प्रहार भएको भारतिय सञ्चारमाध्यमहरुले जनाएका छन् । ती सञ्चारमाध्यमहरुका अनुसार बम प्रहारबाट हुसेन गम्भीर घाइते भएका छन् । उनलाई मुर्सिदावाद जिल्लाको एउटा मेडिकल कलेजमा भर्ना गरिएको छ । बम हमलाबाट मन्त्रीसँगै रेल यात्राको तयारीमा रहेका अन्य व्यक्तिहरु पनि घाईते भएका छन् ।
पश्चिम बङ्गालको मुर्सिदावाद जिल्लाको निमटिटा स्टेशनबाट कोलकाता जानका लागि रेल चढ्न जाँदै गर्दा अज्ञात व्यक्तिले मन्त्री हुसेनमाथि बम प्रहार गरेका थिए । स्थानीय रेल स्टेशनको २ नम्बरको प्लेटफर्मबाट उनी रेल चढ्नेक्रममा बम प्रहार भएको भारतीय प्रहरी अधिकारीहरुले बताएका छन् ।
बम प्रहारबाट भारतीय जनता पार्टीका मुर्सिदाबाद जिल्लाका अध्यक्ष शिवाजी राय सहित भाजपाका केहि कार्यकर्ताहरु समेत घाईते भएको सञ्चारमाध्यमहरुले जनाएको छन् । मर्सिबाद मेडिकल कलेजमा प्राथमिक उपचारपछि मन्त्री हुसेनलाई थप उपचारका लागि कोलकता लैजाने तयारी गरिएको छ ।
घटनालाई लिएर भारजपाले विपक्षी पार्टीलाई आक्रमणको दोषी रहेको आरोप लगाएको छ । तृणमुलका नेता एवं प्रदेशका एक बरिष्ठ मन्त्री मलय घटकले आक्रमण विपक्षीहरुले गरेको आरोप लगाए । घटना लगत्तै बङ्गालका केहि स्थानमा भाजपा र टिएमसीका कार्यकर्ताहरुबीच झडप भएको खबर समेत भारतिय सञ्चारमाध्यमले छापेका छन् ।
भारतका रेलान्त्री पीयूष गोयलले बम हमलाको निन्दा गरेका छन् । उनले हमलालाई नृशंस बताउंदै हमलाबाट घाईतेहरुको सिघ्र स्वास्थ्यलाभको कामना पनि गरेका छन् ।
प्रतिक्रिया