काठमाडौं । प्रधानमन्त्री केपी शर्मा ओलीले लोकतान्त्रिक प्रणालीभन्दा अर्को उपयुक्त बाटो नभएको बताएका छन् ।
प्रजातन्त्र दिवसका अवसरमा आयोजित कार्यक्रमलाई सम्बोधन गर्दै प्रधानमन्त्री ओलीले लोकतान्त्रिक प्रणाली र शान्तिपूर्ण राजनीतिको मूलधारभन्दा अर्को उपयुक्त राजनीतिको बाटो हुन नसक्ने बताए । उनले अहिले पनि अन्यथा बाटोबाट अगाडि बढ्न खोज्ने प्रवृत्ति मौजुद रहेको बताउँदै अन्यबाटोबाट लक्ष्य हासिल नहुने स्पष्ट पारे । ।
प्रधानमन्त्री ओलीले कुनै हिसाबले अलमल गर्ने र लोकतन्त्रलाई अलमलमा पार्ने क्रियाकलाप कसैले गर्न नहुने भन्दै सानातिना मतभेदलाई छोडेर बृहत्तर राष्ट्रिय हितमा एकताबद्ध भएर अगाडि बढ्न आह्वान गरे ।
प्रणालीगत हिसाबले आफुले अनेक चरणमा संघर्ष गरेको उल्लेख गर्दै लोकतान्त्रिक प्रणालीबाट उपलब्धी पनि हाँसिल हुँदै आएको दाबी गरे ।
उनले संघीय लोकतान्त्रिक गणतन्त्र निर्जीव नभई सजीव प्रणाली भएको उल्लेख गर्दै शान्तिपूर्ण लोकतान्त्रिक प्रणालीप्रतिको आफ्नो विश्वास बढाउन पनि आग्रह गरे ।
उनले लोकतन्त्रलाई कूबाटोतर्फ लैजाने चेष्टा अगाडि जान नदिन मुलुक नयाँ निर्वाचनतर्फ अग्रसर भएको बताउँदै लोकतन्त्र जनताका आकांक्षा र अभिमतबाट सञ्चालन हुन सक्नुपर्ने बताए ।
प्रतिक्रिया