काठमाडौं । प्रतिनिधिसभा विघटन विरुद्धको मुद्दामा बहस सकिएको छ ।
सर्वोच्च अदालतको संवैधानिक इजलासमा माघ ४ गतेदेखि निरन्तर जारी बहस एमिकस क्यूरीको राय लिएसँगै सकिएको हो ।
शुक्रबार एमिकस क्यूरीको तर्फबाट अधिवक्ता गीता पाठकले अन्तिम राय दिएपछि मुद्दाको बहस सकिएको हो ।
बहस सकिएसँगै इजलासले सोमबारभित्र बहस नोट उपलब्ध गराउन आग्रह गरेको छ । प्रधानन्यायाधीस चोलेन्द्र शमशेर जबराले फागुन १० गतेभित्र बहस नोट दिन रिट निवेदकको पक्ष, विपक्ष र एमिकस क्यूरीका कानुन व्यवसायीहरुलाई आग्रह गरेका छन् ।
बहसमा १३ वटा रिट निवेदकको पक्षमा ७२ कानुन व्यवसायीले बहस गरेका थिए। विपक्षमा महान्यायाधिवक्ता र सरकारी वकिल र निजी कानुन व्यवसायीसहित ४८ जनाले बहस गरेका थिए। यसैगरी अदालतका सहयोगी पाँच जना एमिकस क्यूरीले समेत आफ्नो राय दिएका छन् ।
बहस नोट प्राप्त गरेसँगै इजलासले ती नोटहरुको अध्ययत गर्नेछ । तर त्यसका लागि अझै केही दिन लाग्नसक्ने देखिएको छ ।
प्रधानन्यायाधीश चोलेन्द्रशमशेर जबरा नेतृत्वको संवैधानिक इजलासमा यो मुद्दा विचाराधीन छ । इजलासमा न्यायाधीश विश्वम्भर प्रसाद श्रेष्ठ, अनिलकुमार सिन्हा, सपना प्रधान मल्ल र तेजबहादुर केसी रहेका छन्।
प्रतिक्रिया