काठमाडौं । नेपाललाई अति कम विकसित देशबाट विकासशील देशमा स्तरोन्नती गर्न संयुक्त राष्ट्रसंघको विकास नीतिसम्बन्धी समितिले सिफारिस गरेको छ ।
समितिले नेपालसहित लाओस र बंगलादेशलाई समेत स्तरोन्नती गर्न सिफारिस गरेको हो । पाँच वर्षको तयारी अवधी पुरा गरेपछि सन् २०२६ बाट यो स्तरोन्नती कार्यान्वयनमा आउनेछ । कम्तिमा तीन क्षेत्रमा तोकिएको मापदण्ड पूरा गरेपछि स्तरोन्नति हुनका लागि योग्य हुनेछ ।
स्तरोन्नतिका मुख्य मापदण्ड रहेका प्रतिव्यक्ति आय, मानव विकास सूचकांक र आर्थिक जोखिम सूचकांक मध्ये नेपालले दुई सूचकांकका तोकिएको मापदण्ड पार गरिसकेको छ । प्रतिव्यक्ति आयको सुचकांक पुरा गर्न बाँकी रहेकोछ । २०१५को भूकम्प र कोरोना महामारीका कारण नेपालको प्रतिव्यक्ति आयको सुचकांक पुरा हुन बाँकी रहेको छ ।
गत फागुन १० गतेदेखि १४ गतेसम्म बसेको बैठकमा स्तरोन्नतीका लागि तोकिएको मापदण्ड नेपालले लगातार तीन समीक्षा बैठकमा पुरा गरेको निस्कर्ष निकालिएको थियो । सोही निस्कर्षका आधारमा नेपाललाई सन् २०२६ देखि लागु हुनेगरी स्तरोन्नती गर्ने सिफारिस भएको हो ।
समितिबाट भएको सिफारिसलाई संयुक्त रास्ट्रसंघको आर्थिक तथा सामाजिक परिसदले स्वीकृत गर्नुपर्ने संयुक्त रास्ट्रसङ्घका लागि नेपालको स्थायी नियोगले जनाएको छ ।
२०२६बाट स्तरोन्नती हुनेभएपछि नेपालले अल्पविकसित मुलुकमा रुपमा पाइरहेको सुबिधा सन् २०२२देखि २०२६सम्म निरन्तर पाउनेभएको छ ।
प्रतिक्रिया