काठमाडौं । नेपाली कांग्रेस अनिर्णयको बन्दी भएको भन्दै देउवा इतरका कांग्रेस नेताहरुले आरोप लगाईरहेका बेला कांग्रेस सभापति शेरबहादुर देउवाले पदाधिकारीको बैठक आह्वान गरेका छन् । सत्ता समिकरण सहित पछिल्लो राजनीतिक घटनाक्रमबारे छलफल गरी पार्टीको आधिकारीक धारणा बनाउन पदाधिकारी बैठक बोलाईएको हो ।
सोामबार दिउँसो २ बजेका लागि सभापति देउवाले पदाधिकारीहरुलाई पार्टी कार्यालयमा बोलाएको कांग्रेसका एक नेताले बताए ।
बैठकमा वर्तमान पदाधिकारीहरु सहित पूर्वपदाधिकारीहरुलाई पनि बोलाईएको छ । कांग्रेसले अलमल गरेका कारण ओली नेतृत्वको सरकारको आयु लम्बिईरहेको माओवादी केन्द्र र जसपाका नेताहरुले आरोप लगाएपछि देउवाले बैठक बोलाएका हुन् । प्रधानमन्त्री केपी शर्मा ओलीविरुद्ध अविश्वासको प्रस्ताव ल्याउन माओवादी केन्द्र र जसपाले कांग्रेसलाई दबाब दिइरहेका बेला कांग्रेसले निर्णय दिन नसकेको बिषयमा कांग्रेस वरिष्ठ नेता रामचन्द्र पौडेल र युवा नेता गगन थापाले बताउँदै आएका छन् ।
फागुन २३ गते सर्वोच्च अदालतले एमाले र माओवादी केन्द्रबीच भएको एकीकरणलाई मान्यता नदिई पूर्ववत् नेकपा–एमाले र नेकपा माओवादी केन्द्र लाई नै ब्युँताएपछि सत्ता समीकरणका लागि नयाँ कसरतहरु सुरु भएका छन्।
प्रतिक्रिया