काठमाडौं । नयाँ सरकार गठनबारे गम्भीर विवादमा रहेको जनता समाजवादी पार्टी जसपा आन्तरिक छलफलमा जुटेको छ ।
प्रधानमन्त्रीबाट केपी शर्मा ओलीलाई विस्थापित गर्ने या उनैलाई टिकाइराख्ने भन्ने विषयमा जसपाका दुई समुहबीच गम्भीर मतभेदकै बीच छलफल बोलाइएको हो । पार्टी कार्यालय बालकुमारीमा शिर्ष नेताहरुको बैठक बस्न लागेको हो ।
प्रतिनिधिसभामा जसपा सरकार गठनका लागि निर्णायक शक्ति हो । राष्ट्रपति विद्यादेवी भण्डारीले नयाँ सरकार गठनका लागि भोलि राति ९ बजेसम्मको समय दिएकी छिन् । जसपाभित्र अध्यक्ष उपेन्द्र यादवसहितको बहुमत पक्षले ओलीलाई प्रधानमन्त्रीबाट विस्थापित गरी कांग्रेस नेतृत्वमा नयाँ सरकार बनाउनुपर्ने अडान राख्दै आएको छ । तर अर्का अध्यक्ष ठाकुर पक्षले भने ओलीलाई नै फेरि प्रधानमन्त्री बन्न सहज हुनेगरी तटस्थ बस्ने जनाएको छ ।
प्रधानमन्त्रीले वैशाख २७ गते विश्वासको मत लिँदा पनि जसपाका दुई समुहबीच प्रत्यक्ष विभाजन देखिएको थियो । यादव पक्षले विपक्षमा मतदान गरेको थियो भने ठाकुर पक्ष तटस्थ बसेको थियो ।
दुई दिनको बीचमा जसपाका दुई समुहका नेताहरुबीच आरोप प्रत्यारोप चलेको छ ।
छलफलबाट नयाँ सरकार गठनमा सहयोगी बन्ने गरी ठाकुर पक्ष सहमत नभए केन्द्रीय कार्यकारिणीको बहुमतको निर्णयका आधारमा अघि बढ्ने यादव पक्षले तयारी गरिरहेको छ । ठाकुर पक्षले भने कार्यकारिणी समितको बैठक बस्नै आनाकानी गर्दै आएको छ ।
यसैबीच ठाकुर र अर्का नेता राजेन्द्र महतोले आजै शितलनिवास पुगेर राष्ट्रपतिलाई भेट गरी पार्टीमा अध्यक्ष महन्थ ठाकुरको निर्णय मात्र मान्य हुने भन्दै नयाँ सरकारका लागि यादव पक्षको मागलाई स्वीकार नगर्न आग्रह गरेको छ । उनीहरु शितल निवास पुग्नुअघि प्रधानमन्त्री ओलीलाई भेट गरेका थिए ।
प्रतिक्रिया