काठमाडौं । १४९ सांसदहरुको हस्ताक्षरसहित प्रधानमन्त्रीमा शेरबहादुर देउवाको दाबीसहितको पत्र राष्ट्रपति कार्यालयमा दर्ता भएको छ ।
संविधानको धारा ७६ को उपधारा ५ बमोजिम १४९ जना सांसदहरुको हस्ताक्षर जुटाएर देउवाले विपक्षी गठबन्धनको तर्फबाट प्रधानमन्त्रीमा दाबी पेश गरेका हुन् ।
कांग्रेस, माओवादी केन्द्र, एमाले माधव पक्ष र जसपाको यादव भट्टराई पक्षको समर्थनसहित देउवाले नयाँ सरकारको नेतृत्वमा दाबी पेश गरेका हुन् ।
दाबी पेश गर्न विपक्षी दलका नेताहरु एमाले नेता माधवकुमार नेपालसहित राष्ट्रपति कार्यालय पुगेका थिए ।
पत्र दर्तापछि राष्ट्रपति भण्डारीले संविधान र कानूनका आधारमा विज्ञहरुसँग सल्लाह गरेर निर्णय दिने बताएकी छिन् । प्रधानमन्त्री ओलीले पनि भर्खरै दाबी पेश गरेको सुनाउँदै राष्ट्रपति भण्डारीले कानूनी सल्लाह गरेर निस्कर्षमा पुग्ने बताएकी छिन् । त्यसक्रममा एमाले वरिष्ठ नेता माधवकुमार नेपालले ओलीले गरेको १२१ जनाको दाबीमाथि प्रश्न उठाएका थिए ।
धारा ७६ (५) अनुसार कुनै पनि सांसदले आफुसँग बुहमत सांसदहरुको समर्थन छ भन्ने प्रमाणसहित प्रधानमन्त्रीमा दावी पेश गर्न सक्छन् । यो धारा अनुसार प्रधानमन्त्री बन्न चाहनेले बहुमत सांसद आफ्नो पक्षमा भएको पुष्टि गर्नुपर्छ ।
प्रतिक्रिया