संसद विघटन विरुद्ध कांग्रेसले कानूनी र राजनीतिक लडाईं लड्ने

काठमाडौं । नेपाली कांग्रेसले संसद विघटन विरुद्ध कानूनी र राजनीतिक लडाईं लड्ने निर्णय गरेको छ ।

शनिबार बिहान बसेको कांग्रेस पदाधिकारी र पूर्वपदाधिकारीको संयुक्र बैठकले राष्ट्रपतिले फेरि एकपटक अलोकतान्त्रिक र असंवैधानिक कार्य गरेको ठहर गर्दै त्यस विरुद्ध कानूनी र राजनीतिक लडाईं लड्ने निर्णय गरेको हो ।

कांग्रेसले मध्यरातमा राष्ट्रपतिले षड्यन्त्रपूर्वक संसद विघटन गरेको निस्कर्ष निकाल्दै त्यस विरुद्ध लाग्न नागरिक समाजलाई समेत आह्वानसमेत गरेको छ ।

बैठकले लोकतन्त्र गम्भीर खतरामा पुगेको निस्कर्ष पनि निकालेको छ । त्यस विरुद्ध अन्य दलहरुसँग पनि सहकार्य गर्दै बढ्ने कांग्रेसले निर्णय गरेको छ बैठकपछि कांग्रेस सहमहामन्त्री डा. प्रकाशशरण महतले बताए । ‘अन्य दलहरुसँग पनि सहकार्य गरी लोकतन्त्र रक्षाका लागि राजनीतिक र कानुनी लडाइँ लड्छौं’, महतले भने ।