मेडिकल माफियाका प्रमुख संरक्षक नै प्रधानमन्त्री ओली भएको डा. गोबिन्द केसीको आरोप

काठमाडौं । चिकित्सा शिक्षा क्षेत्र सुधारका अभियन्ता डा. गोविन्द केसीले प्रधानमन्त्री केपी शर्मा ओली मेडिकल माफियाका प्रमुख संरक्षक रहेको आरोप लगाएका छन् । बीएण्डसीका सञ्चालक दुर्गा प्रसाईंले आफ्नो मिडिया संयोजक प्रितम सुवेदीमाथि भौतिक आक्रमणको धम्की दिएको खबर सार्वजानिक भएलगत्तै विज्ञप्ति पठाउँदै डा. केसीले प्रस्तावित बीएण्डसी मेडिकल कलेज सञ्चालक प्रधानमन्त्रीको आर्थिक र राजनीतिक साझेदार रहेको आरोप समेत लगाएका छन् ।

द्वन्द्वग्रस्त मुलुक यमनमा रहेका डा. केसीले प्रधानमन्त्री ओलीले आफू र आफ्ना आसेपासेको कालो धनको लगानीबाट स्थापित निजी संस्थाहरुको दूषित स्वार्थपूर्तिका खातिर कानून बनाउने, राज्य कब्जा गर्ने र राज्यका संस्थाको चरम दुरुपयोग गर्ने कार्य गर्दै आएको आरोप लगाउँदै आपराधिक आर्जनको लगानी गरी चिकित्सा शिक्षाको व्यापारिकरण गर्ने मेडिकल माफियाका प्रमुख संरक्षक नै प्रधानमन्त्री ओली भएको बताएका छन् ।

चिकित्सा शिक्षा नियमावली २०७७ अनुसार नवीकरण नगराएको आशयपत्र स्वतः रद्द हुने भए पनि प्रधानमन्त्री ओलीले जबर्जस्ती चिकित्सा शिक्षा आयोगको बैठक राखेर अवैध निर्णय गर्न आयोगका सदस्यहरुलाई बाध्य पार्न खोजेको केसीले विज्ञप्तिमा उल्लेख गरेका छन् ।

उनले प्रधानमन्त्री ओलीको संरक्षण पाएपछि जस्तोसुकै अवैध काम गर्न सकिन्छ भन्ने विश्वासका कारण उक्त प्रस्तावित मेडिकल कलेजले २०७३ सालयता आशयपत्र नवीकरण पनि नगरेको जिकीर गरेका छन् ।

केसीले आफू हाल द्वन्द्वग्रस्त मुलुक यमनमा रहेको उललेख गर्दै बीएण्डसी कलेजलई जबर्जस्ती अवैध सम्बन्धनको प्रक्रिया अघि बढाए नेपाल फर्कनासाथ सत्याग्रह सुरु गर्ने चेतावनी समेत दिएका छन् ।