काठमाडौं । नेपाली कांग्रेसका सभापति शेरबहादुर देउवाले पदाधिकारी बैठक बोलाएका छन् । भोलि बुधबार बिहान ९बजे आफ्नै निवास बुढानिलकण्ठमा बस्नेगरी देउवाले पार्टी पदाधिकारी बैठक बोलाएका हुन् ।
बैठकमा समसामयिक राजनीतिक घटनाक्रम र १४औं महाधिवेशनको तयारीबारे छलफल हुनेछ । कांग्रेस, माओवादी केन्द्र, एमाले नेपाल पक्ष, जसपा र राष्ट्रिय जनमोर्चासहितको पाँच दलीय गठबन्धनले बहुमत सांसदको हस्ताक्षरसहित देउवालाई प्रधानमन्त्री बनाउन दाबी पेश गरेपनि राष्ट्रपतिले जेठ ७ गते अस्वीकार गरेकी थिइन । त्यसलगत्तै उनले प्रधानमन्त्री केपी शर्मा ओलीको सिफारिसमा संसद भंग गरेर नयाँ चुनावको मिति समेत तोकेकी छिन् । त्यसको विरुद्ध देउवाकै नेतृत्वमा पाँचै विपक्षी दलका १४६ सांसदहरुले सोमबार मात्रै सर्वोच्च अदालतमा रिट दायर गरेका छन् ।
यसबीचको समीक्षा र अब कसरी अघि बढ्ने भन्नेबारेमा पदाधिकारी बैठकमा छलफल हुनेछ । यसअघि बसेको पदाधिकारी बैठकले राष्ट्रपतिले चालेको कदमलाई अलोकतान्त्रिक र असंवैधानिक भन्दै त्यसको कानूनी र राजनीतिक प्रतिवाद गर्ने निर्णय गरेको थियो ।
प्रतिक्रिया