काठमाडौ । कोरोना भाइरसको संक्रमण बढ्न नदिन सरकारले उच्च सतर्कता अपनाउँदै केही दिन अत्यावश्यकबाहेकका सेवा बन्द गर्ने निर्णय गरेपछि काठमाडौं उपत्यका छाड्नेको संख्या ह्वात्तै बढेको छ ।
महानगरीय ट्राफिक प्रहरी महाशाखाका अनुसार, विहान ६ बजेदेखि १२ बजेसम्ममा एक लाख आठ हजार ६८५ जना काठमाडौंबाट बाहिरिएका छन् । विगतको तुलनामा यो संख्या बढी रहेको ट्राफिक प्रवक्ता एसपी जीवनकुमार श्रेष्ठ बताउनुहुन्छ ।
चैत १० गतेबाट लामो दूरीका यातायातका साधन चल्न प्रतिवन्ध लगाउने भएपछि काठमाडौं छाड्ने बढेका हुन् । आज छ घण्टाको अवधिमा काठमाडौं प्रवेश गर्नेको सख्या भने १३ हजार छ ।
हिजो दिनभरमा एक लाख ३० हजारले काठमाडौं उपत्यका छाडेका थिए । विहीबारका दिन एक लाख आठ हजार, बुधबार ९५ हजार, मंगलबार ९१ हजार, सोमबार ८८ हजार, आइतबार ८६ हजार र शनिवारका दिन ७१ हजारले काठमाडौं छाडेका थिए ।
प्रतिक्रिया