काठमाडौं । नेकपा एमालेमा नेपाल पक्षको बलियो खम्बाकारुपमा रहेका एमाले नेता तथा राष्ट्रियसभा सदस्य बेदुराम भुसालले एमाले परित्याग गरेर स्वतन्त्र बस्ने घोषणा गरेका छन् । भुसालले संसद सचिवालयमा पत्र पठाउँदै आफु स्वतन्त्र बस्न चाहेको जनाउ दिएका हुन् ।
एमाले विवाद उत्कर्षमा पुगेका बेला भुसालले नेकपाबाट निर्वाचित भएकाले आफू स्वतन्त्र रुपमा राष्ट्रिय सभा सदस्यको हैसियतमा रहन चाहेको बताएका छन् ।
आफू तत्कालीन नेकपाबाट उम्मेदवार बनि राष्ट्रियसभा सदस्यमा निर्वाचित भएको सदस्य भएको र सर्वोच्चको फागुन २३ को फैसलापछि पार्टीको अस्तित्व समाप्त भएको अवस्थामा आफू स्वतन्त्र भूमिकामा रहन चाहेको भुसालले संसद सचिवालयका महासचिवलाई लेखेको पत्रमा उल्लेख छ ।
सर्वोच्च अदालतको २०७७ फागुन २३ को फैसलाले उक्त पार्टीको अस्तित्व समाप्त गरिदिएको उल्लेख गर्दै त्यस पार्टीबाट उम्मेदवार भइ निर्वाचित मसहितका जनप्रतिनिधिहरु दलविहीन अर्थात स्वतन्त्र हुनुपरेको भुसालले जनाएका छन् । ‘म नेकपा एमाले वा माओवादी केन्द्र कसैको पनि संसदीय दलको सदस्य नबनी सभाको स्वतन्त्र सदस्यका रुपमा रहेको छु र आगामी दिनमा पनि सभाको स्वतन्त्र सदस्यका रुपमा नै रहन चाहन्छु ।’उनले पत्रमा भनेका छन् ।
भुसालले आफूलाई राष्ट्रियसभामा स्वतन्त्र सदस्यको रुपमा व्यवहार गर्न र सम्बन्धित सबैलाई यसको आवश्यक जानकारी एवम् निर्देशन दिन पनि अनुरोध गरेका छन् । उनले आफूले पाउने पारिश्रमिक र अन्य सेवा सुविधाबाट लेबी वा अन्य कुनै पनि दलको खातामा जम्मा नगरिदिन पनि संसदको लेखा शाखालाई जानकारी गराइदिन भनेका छन् ।
प्रतिक्रिया