तपाईंको मास्क खै ?

काठमाडौं । उपत्यकामा बढ्दो कोरोना भाइरस संक्रमण रोकथाम तथा नियन्त्रणका लागि ट्राफिक प्रहरीले मास्क अभियान थालेको छ । ट्राफिक प्रहरीले स्वास्थ्य मापदण्ड अनिवार्य पालना र घरबाहिर निस्कँदा अनिवार्य मास्क प्रयोग गर्न ‘तपाईंको मास्क खै रु लेखिएको रिबन प्रयोग गरी सचेतना सुरु गरेको हो ।

ट्राफिक प्रहरी महाशाखाका एसएसपी जनक भट्टराईले मंगलबार न्युरोड गेटमा खटिएका ट्राफिक प्रहरीलाई रिवन लगाइ दिएर कार्यक्रम शुभारम्भ गरेका छन् । उपत्यकाको ४४ ट्राफिक कार्यालयका ९ सय ट्राफिक प्रहरीले मंगलबार नै ड्यूटी समय अनिवार्य रिबन प्रयोगमा ल्याउन प्रारम्भ गरेका छन् ।

एसएसपी भट्टराईले अभियानले सम्पूर्ण सडक प्रयोगकर्ता र आमसर्वसाधरणलाई मास्क अनिवार्य प्रयोग गर्नुपर्छ भन्ने स्मरण गराउने र मास्क प्रयोग नगरेकालाई लगाउन प्रेरित गर्ने बताए । यसअघि, अनिवार्य मास्क प्रयोग गर्न÷गराउन ट्राफिक प्रहरीले प्लेकार्ड प्रदर्शन, सार्वजनिक स्थानमा मास्क वितरण, सार्वजनिक यातायातमा अनिवार्य मास्क प्रयोग गर्न सचेतना जगाउने, सामाजिक दूरी कायम गर्न र सिट क्षमताभन्दा बढी यात्रु नचढाउन सचेत गर्नेलगायत कार्यक्रम गर्दै आएको छ ।

फेरि हर्न निषेध अभियान कोरोना संक्रमणपछिका दिन हर्न प्रयोगमा वृद्धि हुन थालेपछि ट्राफिक प्रहरीले काठमाडौं उपत्यकामा फेरि हर्न निषेध अभियान थालेको छ । ट्राफिक प्रहरीले ‘नो हर्न’ अभियान थप प्रभावकारी र कडाई गर्न मंगलबारदेखि ‘हर्न निषेध’का लागि स्टिकर टाँस्ने अभियान सुरु गरेको हो । सो स्टिकर चालकले देख्नेगरी अगाडिको सीसामा टाँसिएको महाशाखाले जनाएको छ ।

महाशाखा प्रमुख एसएसपी भट्टराईले ‘ नो हर्न’ अभियान थप कडाई गर्न मंगलबार उपत्यकाको ३८ ट्राफिक कार्यालयले एकसाथ ५० हजार ‘नो हर्न’ स्टिकर टाँस गरी अभियान सुरु गरेको जानकारी दिए ।

जथाभावी हर्न प्रयोगले ध्वनी प्रदूषण बढ्ने र यसले मानव स्वास्थ्यमा समेत नकारात्मक असर गर्ने हुनाले अति आवश्यक नपरी हर्न प्रयोग नगर्न ट्राफिक प्रहरी महाशाखाले सम्पूर्ण सवारी चालकलाई अनुरोध गरेको छ । महाशाखाले १ वैशाख २०७४ देखि काठमाडौं उपत्यकामा हर्न निषेध अभियान सुरु गरेको थियो । यो समाचार आजको राजधानी दैनिकमा प्रकाशित छ ।