एमालेको आकस्मिक स्थायी कमिटी बैठक बालकोटमा, संसद अधिवेशन अन्त्यपछिको रणनिती निर्माण बैठकको एजेण्डा

काठमाडौं । सरकारले एकाएक दुबै संसदको जारी अधिवेशनको अन्त्य गरेसँगै नेकपा एमाले अध्यक्ष केपी शर्मा ओलीले आकस्मिक स्थायी कमिटी बैठक बोलाएका छन् । सरकारले संसद् अधिवेशन अन्त्य गरेर दल विभाजनसम्बन्धी अध्यादेश ल्याउने अनुमानका आधारमा आन्तरिक रणनीति बनाउन ओलीले आकस्मिक बैठक बोलाएको बताईएको छ ।

ओली निवास बालकोटमा बोलाईएको स्थायी कमिटी बैठकमा भाग लिन उपत्यकामा उपलब्ध स्थायी कमिटीका सदस्यहरु बालकोट पुगिसकेका छन् ।

दल विभाजनसम्बन्धी अध्यादेश ल्याएर देउवा सरकारले माधव नेपाल पक्षलाई पार्टी विभाजन गर्न सजिलो बनाईदिने तयारी गरेको एमालेको ठहर छ । सरकारले एकाएक दुबै संसदको अधिवेशन आजै मध्यरातिबाट अन्त्य गर्ने निर्णय गरेसँगै एमालेले देउवा रणनितीको आँकलन गर्दै बैठक बोलाएको हो ।

एमालेको ओली पक्ष र माधव नेपाल पक्षबीच पार्टी एकताका लागि १०बुँदे सहमति गरे पनि विवाद मिल्ने संकेत देखिएको छैन ।