बुटवल । नेकपा एमालेले कारवाही गरेको भनिएका लुम्बिनी प्रदेशसभाका २ सांसदको पदमुक्तको सूचना प्रदेशसभा सचिवालयले जारी नगरे आज पनि प्रदेशसभा बैठक अवरोध गर्ने एमालेले चेतावनी दिएको छ । नवौं अधिवेसन अन्तर्गत मंगलबार बसेको पहिलो बैठक विपक्षीहरुले अवरोध गरेपछि आजसम्मको लागि स्थगित भएको थियो। लुम्बिनी प्रदेश सभाको बैठक आज पनि बस्दै छ।
२ जना सांसदलाई नेकपा एमालले कारवाही गरेको र त्यो सुचना प्रदेश सभा बैठकमा जानकारी गराउनुपर्ने एमाले संसदीयदलका प्रमुख सचेतक भुमिश्वर ढकालले बताए । एमालेले प्रदेशसभाको पहिलो बैठक पनि सोही माग राख्दै अवरोध गरेको थियो। सभामुखबाट सूचना जारी नभए आजको बैठक पनि अवरोध गर्ने एमालेका प्रमुख सचेतक भुमिश्वर ढकालले जानकारी दिएका छन् ।
बैठक सुचारु गर्ने उपाय खोजिको लागि भन्दै मुख्यमन्त्री कुलप्रसाद केसीले प्रमुख विपक्षीदल एमालेसँग छलफल गर्न भन्दै एमाले नेताहरुलाई मुख्यमन्त्री कार्यलय डाकेका छन् । प्रदेशसभा बैठक शुरु हुनु अघि मुख्यमन्त्री केसी र विपक्षी एमालेबीच छलफल हुने बताईएको छ ।
एमालेले सुर्य चिन्हबाट चुनाव जितेका विमलाकुमारी खत्री वली र हाल मन्त्री भएका अजय शाहीलाई आफ्नो पार्टीले कारवाही गरेको र कारवाहीको सूचना नदिएसम्म बैठक चल्न नदिने बताएको छ।
प्रतिक्रिया