काठमाडौं । माधव नेपाल नेतृत्वको नेकपा (एकीकृत समाजवादी) को दल दर्ताको सनाखत सकिएको छ । नेकपा (एकीकृत समाजवादी) का ३० सांसद र ५५ जना केन्द्रीय सदस्यहरु निर्वाचन आयोग पुगेर सनाखत गरेका हुन् ।
नेकपा एमालेबाट फुटेर नेपाललगायतका नेताहरुले अलग दल नेकपा (एकीकृत समाजवादी) दर्ताका लागि निवेदन दिएका थिए । सो निवेदनपछि दल दर्ताको प्रमाणपत्र दिन आयोगले आज सनाखत गर्न नेताहरुलाई बोलाएको थियो ।
सरकारले गत भदौ १ गते राजनीतिक दलसम्बन्धी अध्यादेश ल्याएसँगै नेता नेपालले नयाँ दल दर्ताका लागि आयोगमा निवेदन दिएका थिए ।
यसअघिको व्यवस्थालाई खुकुलो बनाउँदै २० प्रतिशत केन्द्रीय सदस्य वा संसदीय दलका नेताहरु सहभागी भएमा नयाँ दल खोल्न पाउने प्रावधान संशोधित राजनीतिक दलसम्बन्धी अध्यादेशमा खुलाइएको छ । एमालेसँगको टकरावकाबीच आएको उक्त अध्यादेशले सहजता थपिएसँगै नेपाल पक्षले नयाँ दल दर्ता गरेको हो ।
प्रतिक्रिया