काठमाडौं । नेकपा माओवादी केन्द्रको युवा संगठन योङ कम्युनिष्ट लिग वाईसीएलले नेतृत्व चयन गर्न असफल भएको छ ।
राजधानीमा तीन दिनदेखि जारी भर्चुअल राष्ट्रिय भेलामार्फत वाईसीएलले नयाँ नेतृत्व चयन गर्नुपर्ने थियो ।
सम्मेलनमा सहभागी युवाले नेतृत्व छान्न नसकेपछि पार्टी केन्द्रले हस्तक्षेप गरेको थियो । तर, माओवादी नेतृत्वले समेत संगठनको नेतृत्व चयन गर्न नसक्दा बाँकी पदाधिकारी र केन्द्रीय समिति पनि चयन हुन सकेको छैन । जसका कारण बन्द सत्र लम्बिएको छ ।
वाईसीएलको नयाँ अध्यक्षमा हालका उपाध्यक्ष सुमन देवकोटा, महासचिव सुवोध शेर्पाली र यशोदा न्यौपाने प्रतिस्पर्धामा रहेका छन् । यी मध्ये एक जनालाई छान्न नसकेपछि माओवादी केन्द्रको स्थायी समिति बैठकले नेतृत्व छान्ने जिम्मा अध्यक्ष प्रचण्डलाई दिएको थियो ।
नेतृत्व चयन हुननसकेपछि वाईसीएलको सम्मेलन केन्द्रीय समिति चयन गरेर मात्र सकिने भएको छ । अब केन्द्रीय समिति मात्रै घोषणा हुने बताइएको छ । अध्यक्ष प्रचण्डसँग भेट गरेका युवा प्रतिनिधिहरुलाई उनले केन्द्रीय समति मात्रै घोषणा गरेर सम्मेलन सक्न निर्देशन दिएका छन् । वाईसीएलको केन्द्रीय समिति २३१ सदस्यीय बन्दैछ ।
वाईसीएलका हालका अध्यक्ष रामप्रसाद सापकोटा दीपशिखा ४० वर्षे उमेरहदका कारण विदा हुँदैछन् । पार्टीका केन्द्रीय सदस्य समेत रहेका उनलाई फ्रयाक्सन इन्चार्ज बनाइएको छ ।
प्रतिक्रिया