बुटवल । लुम्बिनी प्रदेश सरकारका मुख्यमन्त्री कुल प्रसाद केसी सोनामले दसैंको टिका लगाएनन् । दसैंको अवसरमा पर्व मान्ने सवैलाई शुभकामना प्रदान गरेपनि दसैंको टिका भने उनी आफै पनि लगाएनन् र अरुलाई पनि लगाईदिएनन् । मुख्यमन्त्री निवास बुटवलमै मुख्यमन्त्री केसीको दिन वितेको मुख्यमन्त्रीको सचिवालयले जनाएको छ ।
खबरकुरासँग कुरा गर्दै मुख्यमन्त्री केसीले सबै धर्म, परम्परा र संस्कृति प्रति सम्मान रहँदा रहँदै पनि दसैंमा टिका नलाएको बताए । चितवनमा रहेका आफन्तको मृत्यु भएको १३ दिन नपुगेको र दसैं पर्व जनयुद्ध देखि नै नमाउने गरेका कारण पनि टिका नलगाइएको उनले बताए । ‘युद्ध चलिरहेका बेला कसरी दसै मनाउनु, मनाइएन,’ उनले भने, -‘त्यसपछिका दसैंमा पनि साथीभाई र पार्टि कार्यकर्ताहरुबीच शुभकामना आदान प्रदान भएपनि टिका लगाउने लाउने काम गरिएन ।’
मुख्यमन्त्री कार्यालयमा आएका साथीभाईसँग भेटघाट र कुराकानी गरेरै यसवर्षको दसैंलाई बिदा गरिएको मुख्यमन्त्री केसीले बताए ।
उता प्रदेश सरकारका प्रवक्ता कृष्णध्वज खड्काले पनि यस वर्ष दसैंको टिका लगाएनन् । उनले आफ्नै सासुआमाको निधन भएको वर्ष दिन नपुगेको र घर भित्रकै काका नाता पर्ने नातेदारको मृत्यु भएको १३ दिन पनि नपुगेका कारण टिका लगाउने काम नभएको खबरकुरालाई बताए । दसैंको अवसरमा गृह जिल्ला प्युठान पुगेर मतदाताहरुसँग भेटघाट सकेर उनी आजै दाङ झरेका छन् । टिका नभएपनि बुवाको आशिर्वाद थाप्न आज दाङ पुगेको सरकारका प्रवक्ता समेत रहेका आर्थिक मामिला मन्त्री खड्काले बताए ।
प्रतिक्रिया