चितवन । काठमाडौंमा आफन्तको निधन भएपछि रत्ननगर टाँडीका सरोज अधिकारीलाई सोमबार नै काठमाडौं जानुपर्ने भयो । तर, नेत्रविक्रम चन्द ‘विप्लव’ नेतृत्वको माओवादीले मंगलबारका लागि नेपाल बन्दको आह्वान गरेकाले काठमाडौं जाने गाडी एकदमै कम भेटिएका थिए । नारायणगढ पुलचोक पुगेपछि धेरै गाडी भेटिने आशमा उनी सोमबार साँझ बुटवल जाने गाडी चढेर पुलचोक ओर्लिए ।
पुलचोकमा पनि उनले सोचेँ जसरी काठमाडौं जाने गाडी आएका थिएनन् । राति ८ बजेसम्म गाडी कुर्दा पनि गाडी नआएपछि उनी टोलाएर बसेका थिए । त्यत्तिकैमा एक जना व्यक्ति आएर काठमाडौं जाने ट्याक्सी तयार रहेको बताए । उनी ट्याक्सी चढे । ट्याक्सीमा अरु यात्रु पनि थिए । ट्याक्सी चालकले एक हजार भाडा लाग्ने बताए ।
बीच बाटोमा पुगेर अलपत्र परेका उनले एक हजार रुपैयाँ भाडा तिर्ने सहमति भयो । तर, ट्याक्सी चालकले मादक पदार्थ सेवन गरेका रहेछन् । अल्लि पर पुगेपछि ट्याक्सीबाट ओर्लेर उनी पुनः पुलचोकमै पुगे ।
‘आफन्त बितेर जानै पर्ने भएर यहाँसम्म आइयो । मंगलबार बन्द रहेछ । गाडी पाउनै सकिएन,’ उनले गुनासो गरे, ‘जति भाडा मागे पनि तिर्छु भनेर चढेको थिए । ड्राइभरले त रक्सी पो धोकेको रैछ । उ…पर पुगेर झरेर आएँ ।’
करिब आधा घण्टा कुरेपछि ग१ख ९११२ नम्बरको बस आइपुग्यो । काठमाडौं जानका लागि पुलचोक पुगेर गाडी कुर्नेको भिड थियो । गाडीले ‘काठमाडौं…काठमाडौं’ जाने भनेपछि यात्रु गाडीको पछि दगुरे । गाडीका साहुले आठ सय रुपैयाँ भाडा लाग्ने बताए ।
मंगलबार काठमाडौं नपुगि नहुने सरोज जस्ता केहि यात्रु आठ सय रुपैयाँ भाडा भने पनि गाडीको सिटमा गएर बसे । नारायणगढदेखि काठमाडौँको वास्तविक बस भाडा साढे चार सय रुपैयाँ हो ।
भाडा महँगो मानेका केही यात्रुले भने ‘किन यति धेरै महंगो रु’ भनेर गाडी सहचालकलाई प्रश्न गरे ।
वैदेशिक रोजगारीमा जानु पूर्वतालिम लिन काठमाडौं जान लागेका भरतपुर महानगरपालिका-९ का दिनेश रेग्मीले मंगलबार बन्द भन्दैमा बढी भाडा असुल्न पाइन्छ रु भन्दै प्रश्न गरे । सहचालकले भने काठमाडौँको वास्तविक भाडा पाँच सय भए पनि बाध्यतामा पर्ने यात्रु जसरी पनि आठ सय रुपैयाँ तिरेर जाने खुलाए ।
‘भोलि बन्द छ । जानै पर्छ । अफिसतिर जानुपर्ने मान्छे झन् जानैपर्छ । नेपाल बन्द भए पनि अफिस त पुग्नै पर्यो,’ उनले भने, ‘पाँच सयमा त हुँदैन । भोलि बन्द छ । आठ सय नै हो भाडा ।’ पाँच सय रुपैयाँमा मिलाउन आग्रह गर्दा पनि गाडीवालाले भाडा नमिलाएको रेग्मीले गुनासो गरे ।
‘गाडी नै नपाइने । पाए पनि अचाक्ली महँगो । त्यहि भएर अर्को दिन जानुपर्ला भनेर फर्किए,’ रेग्मीले भने । त्यसअघि उनले काठमाडौं जाने माइक्रो फेला पारेका थिए । मुढामा बसेर गएपनि पाँच सय रुपैयाँ भाडा लाग्ने भनेपछि आफु नचढेको उनले बताए ।
गाडीले भाडा महँगो भनेपछि उनले प्रहरीलाई पनि जानकारी गराए । पुलचोकमा खटिएका एक जना प्रहरी गाडीभित्र पसेर भाडा महंगोको विषयका गुनासो भए बताउन आग्रह गरे । बाध्यात्मक अवस्थाका यात्रु चुपचाप बसे ।
विप्लव माओवादीको बन्दका कारण धेरै यात्रुले सास्ती पाएका छन् । यहि बन्द यातायात व्यवसायीलाई भने मौकामा चौका भएको छ । चाडपर्व होस् वा अन्य कुनै आपत परेको बेला होस् । यातायात व्यवसायीले यात्रुलाई लुट्नुसम्म लुटेका हुन्छन् ।
प्रतिक्रिया