काठमाडौं । काठमाडौं उपत्यकाका सवारी साधनमा लागू गरिएको जोर–बिजोर प्रणाली आजबाट हटेको छ ।
काठमाडौं उपत्यकाका तीनै जिल्लाका प्रमुख जिल्ला अधिकारीको संयुक्त बैठकले कोभिड-१९ संकट व्यवस्थापन समन्वय केन्द्र (सीसीएमसी) ले गरेको सिफारिशका आधारमा जोरबिजोर प्रणाली हटाउने निर्णय गरेको हो ।
बैठकपछि तीनै जिल्लाका प्रमुख जिल्ला अधिकारी छुट्टाछुट्टै आदेश जारी गरी आजबाट जोर-बिजोर प्रणाली लागू नहुने जनाएका छन् । तर, सार्वजनिक सवारीसाधन सञ्चालन गर्दा स्वास्थ्य मापदण्ड पूर्ण पालना गर्नुपर्ने आदेशमा उल्लेख छ ।
त्यस्तै, सीट क्षमताभन्दा बढी यात्रु राख्नु नपाउने नियम यथावत रहेको छ । मास्क अनिवार्य, सवारी साधनको ढोकामा र सवारी साधनभित्र यात्रुले प्रयोग गर्न पाउने गरी स्यानिटाइजर व्यवस्था गर्नपर्ने आदेशमा भनिएको छ ।
यससँगै चालक तथा सहचालकले मास्क र फेस–सिल्ड लगाउनुपर्ने, सवारी साधनलाई निःसंक्रमित गर्नुपर्ने, मास्क नलगाई आएको अवस्थामा पाँच रुपैयाँमा पाउने गरी मास्क उपलब्ध गराउनुपर्ने, मास्क नलगाउने व्यक्तिलाई सवारीसाधनमा प्रवेश दिन नहुने प्रमुख जिल्ला अधिकारीहरुको आदेशमा उल्लेख छ ।
प्रतिक्रिया