लुम्बिनी प्रदेशमा खुल्यो सहकारी दर्ता कार्यालय

दाङ । लुम्बिनी प्रदेशको राजधानी देउखुरीमा प्रदेशस्तरीय सहकारी दर्ता अधिकारीको कार्यालय स्थापना गरिएको छ । ६५औँ सहकारी दिवसको अवसर पारेर राप्ती गाउँपालिकाको मौरीघाटमा सहकारी दर्ता अधिकारीको कार्यालय स्थापना गरिएको हो ।

कार्यालयको एक र्काक्रमकाबीच लुम्बिनी प्रदेशका आर्थिक मामिला तथा सहकारीमन्त्री कृष्णध्वज खड्काले उदघाटन गरे । सो अवसरमा बोल्दै मन्त्री खड्काले प्रदेशस्तरीय सहकारी दर्ता, अनुगमन, नियमन लगायतका कार्य गर्न उक्त कार्यालय स्थापना गरिएको बताए । यसअघि मन्त्रालयलेनै गर्दै आएको उक्त कार्य अब सोही कार्यालयबाट हुने उनले जनाए ।

केन्द्र सरकारले केन्द्रीय स्तर, प्रदेशले प्रदेश स्तरका र स्थानीय तहले स्थानीय स्तरका सहकारी संस्थाहरूलाई हेरिरहेको मन्त्री खड्काले बताए । अझै पनि सहकारी व्यवस्थित हुन नसकेको भन्दै उनले त्यसलाई व्यवस्थित गर्न उक्त कार्यालयको भूमिका महत्वपूर्ण हुने र सहकारी लाई पूर्ण रूपमा प्रविधि मैत्री बनाउनुपर्ने बताए ।