काठमाडौं । चितवनको भरतपुर महानगरपालिका प्रमुखमा सत्ता गठबन्धनबाट नेकपा माओवादीकी उम्मेदवार रेनु दाहाल विजयी भएकी छिन् ।
मतगणना नसकिएको भएपनि दाहालले बनाएको फराकिलो अग्रताका कारण उनी विजयी भएकी हुन् । तर प्राविधिक रुपमा भन् मतगणनाको अन्तिम नतिजा आएपछि मात्र निर्वाचन कार्यालयले दाहाल विजयी भएको घोषणा गर्नेछ ।
दाहालले अहिलेसम्म ११ हजार ४५७ बढी मतले नेकपा एमालेका उम्मेदवार विजय सुवेदीलाई पछि पारेकी छिन् । जबकी, मतगणना गन्न बाँकी वडा नं. २७, २८ र २९ को कुल खसेको मत पुरै विपक्षीलाई गयो भने पनि दाहालकै अग्रता बढी रहन्छ । भरतपुरमा ११,१७३ मत मात्र गणना गर्न अझै बाँकी छ ।
दाहालले अहिलेम्म ४७ हजार ४० मत प्राप्त गरेकी छन् । नेकपा एमालेका विजय सुवेदीले ३५ हजार ५८३ मत पाएका छन् ।
भरतपुरमा कूल १ लाख २७ हजार ८३९ मत खसेको थियो । जसमध्ये १ लाख १६ हजार ६६६ गणना भइसकेको छ ।
वडा नं. २७ को मतगणना गर्नुअघि प्रहरीले एमाले कार्यकर्तालाई पक्राउ गरेपछि केहीबेर मतगणना स्थगित भएको थियो । अहिले भने पुनः सुचारु भएको छ ।
उपमेयरमा नेपाली कांग्रेसका चित्रसेन अधिकारी विजय भएका छन् ।
प्रतिक्रिया