वनको डढेलो वस्तिमा पस्दा सल्यानका १५ घरगोठ जलेर नष्ट

सल्यानमा आगलागीबाट १५ घर गोठ जलेर नष्ट भएका छन् । वनको डढेलो वस्तीमा फैलदा स्थानीयका १५ घरगोठ जलेर नष्ट भएको जिल्ला प्रहरी कार्यालय सल्यानका प्रहरी निरीक्षक प्रेमशंकर चोधरीले जानकारी दिए ।

छत्रेश्वरी गाउँपालिका वडा नं. ७ मा रहेको फेदीखोला सामुदायिक बनबाट सल्किएको आगोले बन नजिक रहेका श्रीचौरका ८ घर र ७ गोठ जलेर नष्ट भएको प्रहरी निरीक्षक चौधरीले सेतोपाटीलाई बताए ।

आगलागी बाट स्थानीय चक्रबहादुर दमाई, बेदबहादुर बोहोराको घर र शेरबहादुर केसी, कालिबहादुर केसी लगाएतका घर गोठ जलेर नष्ट भएको प्रहरीले बताएको छ । आगोले एउटा बोका र केही कुखुरा समेत मरेको चौधरीले जानकारी दिए । पिडितहरुले छिमेकीको घरमा आस्रय लिइरहेका छन् ।

हावाहुरी चलेको कारण वनको आगो नजिकैको बस्तिमा फैलिएको र हावाका कारण समयमै आगो नियन्त्रणमा समस्या भएको चौधरीले बताए। डढेलो राति नौबजेपछि मात्र नियन्त्रणमा आएको थियो । प्रहरीले आगलागीबाट भएको क्षतिको एकीकरण विवरण आइतबार संकलन गर्ने प्रहरीले बताएको छ। शनिबार दिउँसो पौने ३ बजेदेखि वनको डढेलो बस्तिमा पसेको थियो । जंगलमा आगो कस्ले लगाएको हो र त्यो बस्तिमा कसरी आइपुग्यो भन्ने बारेमा अनुसन्धान जारी रहेको प्रहरीले अनुसन्धान गरिरहेको छ ।

यसैबिच नेपाल रेडक्रस सोशाईटी सल्यानले आगलागी पिडितलाई केही राहत सामाग्री वितरण गरेको छ । आगलागी बाट पिडित ५ घरपरिवारलाई राहत सामाग्री वितरण गरेको र बाँकीलाई आज आइतबार वितरण गर्ने रेडक्रस सल्यानले जनाएको छ ।