काठमाडौं । प्रधानमन्त्री केपी शर्मा ओली र सभामुख अग्निप्रसाद सापकोटाबीच संसदको आगामी अधिवेशनका विषयमा छलफल भएको छ ।
बुधबार बिहान प्रधानमन्त्री निवास बालुवाटारमा भएको छलफलमा अधिवेशन बोलाउने विषयमा छलफल भएको सभामुखका प्रेस सल्लाहकार श्रीधर न्यौपानेले बताए ।
प्रधानमन्त्री र सभामुखबीच विनियोजन विधेयकका सिद्धान्त र प्राथमिकताको विषय तथा नीति तथा कार्यक्रमको विषयमा समेत छलफल भएको न्यौपानेले जानकारी दिए ।
संसदको बजेट अधिवेशन अर्थात वर्षे अधिवेशन बोलाउने समय भैसकेको छ । यसअघिको परम्पराअनुसार बैशाख २१ गते सरकारको नीति तथा कार्यक्रम सार्वजनिक हुने गरेको थियो । नीति तथा कार्यक्रमका आधारमा आगामी आर्थिक वर्षको बजेट विनियोजन हुनेगरेको छ । जेठ १५ गते वार्षिक बजेट ल्याउनुपर्ने संवैधानिक बाध्यता रहेको छ ।
सरकारको सिफारिसमा राष्ट्रपतिले संसद अधिवेशन आह्वान गर्ने संवैधानिक व्यवस्था रहेको छ । कोरोना भाइरसको महामारीका कारण देश लकडाउनमा रहेका कारण संसद अधिवेशन आह्वान गर्न अप्ठेरो अवस्था रहेको छ ।
प्रतिक्रिया