काठमाडौं । आगामी बैशाख २५ गते बस्ने स्थायी कमिटी बैठकमा छलफलका लागि लैजाने राजनीतिक प्रतिवेदन तयार पार्ने विषयमा नेपाल कम्युनिष्ट पार्टी (नेकपा)का अध्यक्षद्वय केपी शर्मा ओली र पुष्पकमल दाहाल प्रचण्डबीच सहमति भएको छ ।
दुई अध्यक्षबीच सोमबार दिउँसो प्रधानमन्त्री निवास बालुवाटारमा बसेको बैठकमा अध्यक्ष प्रचण्ड र महासचिव विष्णु पौडेलले राजनीतिक प्रतिवेदन तयार गर्ने सहमति भएको हो ।
शनिबार बसेको सचिवालय बैठकको सहमति र भावना अनुसार प्रतिवेदन तयार पारी २४ गते बस्ने सचिवालय बैठकमा पेश हुनेछ । सचिवालय बैठकले सो प्रतिवेदनलाई अनुमोदन गरेपछि २५ गते बस्ने स्थायी कमिटी बैठकमा अध्यक्ष प्रचण्डले पेश गर्नुहुनेछ ।
गत मंसिर ४ गते प्रधानमन्त्री केपी ओलीले पूरै कार्यकाल सरकारको नेतृत्व गर्ने र अध्यक्ष प्रचण्डले कार्यकारी अध्यक्षको हैसियतमा पार्टीको काम सञ्चालन गर्ने निर्णय भएको थियो ।
अध्यक्ष प्रचण्ड र महासचिव पौडेले संयुक्त रुपमा तयार पार्ने प्रतिवेदनमा पार्टीलाई सामुहिक भावनाका साथ अघि बढाउने विषय समेटिने बताइएको छ । पार्टीको निर्देशनमा सरकार संचालन हुने, सरकारले गरेका कामहरुको स्वामित्व पार्टीले लिने, पार्टीलाई एकतावद्ध बनाई समाजवादी बाटोमा अघि बढाउने बाटोबारे पनि राजनीतिक प्रतिवेदनमा उल्लेख गरिने स्रोतले बताएको छ ।
प्रतिक्रिया