काठमाडौं । कोरोना भाइरको महामारीका कारण विदेशमा अलपत्र परेका नेपाली र लकडाउनको मोडाटिलीबारे छलफल गर्न उच्चस्तरीय समन्वय समितिको बैठक बस्दैछ ।
सरकारले विदेशमा अलपत्र अवस्थामा रहेका नेपाली नागरिक स्वदेश फर्किन चाहे ल्याउने गरी तयारी थालेको थियो ।
वैदेशिक रोजगारीको क्रममा विदेश गएका एवं विद्यार्थीहरुलाई स्वदेश फिर्ता कसरी गर्न सकिन्छ भनेर अध्ययन गरेको सरकारले त्यसैका आधारमा समितिमा छलफल गर्न लागेको हो ।
मंगलबार बस्ने कोरोना महामारी नियन्त्रणसम्बन्धी उच्चस्तरीय समन्वय समितिको बैठकले निर्णय गर्नसक्ने समितिका एक सदस्यले बताए । बैठकमा भारत र तेस्रो मुलुकबाट नेपाल आउन चाहनेहरुलाई कसरी ल्याउने, कति संख्यामा ल्याउने, कसरी राख्ने भन्ने बारेमा छलफल हुनेछ ।
विदेशमा अलपत्र नागरिकका विषयमा संसदमा पनि कुरा उठेको थियो । संसदमा मंगलबारै प्रधानमन्त्री केपी शर्मा ओलीले जवाफ दिँदैहुनुहुन्छ ।
यस्तै, आइतबार बसेको मन्त्रिपरिषद् बैठकले लकडाउन लम्ब्याउने निर्णय गरेपछि उच्चस्तरीय समितिले यसको मोडालिटीबारे समेत छलफल गर्ने बुझिएको छ ।
सरकारका प्रवक्ता अर्थ तथा संचार एवं सूचनामन्त्री डा. युवराज खतिवडाले मन्त्रिपरिषद्का निर्णय सार्वजनिक गर्ने क्रममा आइतबार लकडाउनलाई प्रभावकारी र सहज कसरी बनाउन सकिन्छ भन्ने बारेमा समितिमा छलफल हुने बताउनुभएको थियो ।
प्रतिक्रिया