काठमाडौं । कपिलवस्तु र रुपन्देहीमा फेरि १३ जना कोरोना संक्रमित थपिएका छन् ।
बुधबार रुपन्देहीमा एक जना र कपिलवस्तुमा थप १२ जनालाई कोरोना संक्रमण पुष्टि भएको हो ।
भैरहवास्थित प्रदेश जनस्वास्थ्य प्रयोगशालामा गरिएको पीसीआर परीक्षणमा उनीहरुको कोरोना संक्रमण पुष्टी भएको स्रोतले बताएको छ ।
कपिलवस्तुमा ६ जना महिला र ६ पुरुषमा कोरोना संक्रमण देखिएको कपिलवस्तु जिल्ला प्रशासन कार्यालयले जनाएको छ । जसमध्ये विजयनगर गाउँपालिकाका ३ जना र महाराजगञ्ज नगरपालिकाका ९ रहेका छन् ।
भारतबाट बेलहिया नाका हुँदै नेपाल आएर प्रदेश सरकारले क्वारेन्टाइनमा राखेका व्यक्तिलाई कोरोना संक्रमण देखिएको बुझिएको छ ।
स्वास्थ्य मन्त्रालयले थप संक्रमितको औपचारिक पुष्टि गर्न भने बाँकी नै रहेको छ ।
हालसम्म प्रदेश नं. ५ मा कोरोना संक्रमितको संख्या १८७ पुगेको छ । खुला सिमाना र कमजोर क्वारेन्टाइन व्यवस्थापनकै कारण प्रदेश ५ मा कोरोना संक्रमितको संख्या दिनदिनै बढिरहेको छ ।
हालसम्म नेपालमा कोरोना संक्रमितको संख्या ४१९ पुगेको छ । यसमध्ये २ जनाको मृत्यु भएको छ, ३७ जना निको भएर घर फर्किएका छन् ।
प्रतिक्रिया