चितवन । चितवनको भरतपुरमा कोरोना संक्रमितको संख्या बढ्न थालेपछि महानगरका केही वडा सिल गरिएका छन् ।
महानगरका वडा अध्यक्षहरुले आफ्नो वडामा आफुखुशी सिलको निर्णय गरेका हुन् । यो निर्णयप्रति जिल्ला प्रशासन कार्यालयले भने आपत्ति जनाएको छ ।
क्वारेन्टिनमा राखिएकाहरुमा कोरोना संक्रमण पुष्टि हुन थालेपछि वडाअध्यक्षहरुले धमाधम विज्ञप्ति जारी गरेर बन्द गराएका हुन् । केही वडा अध्यक्षहरुले त आफ्नो कार्यक्षेत्रमा नपर्ने बैंक तथा वित्तीय संस्थासमेत बन्द गराएका छन् ।
वडा नं. ५, ६, ११, १८, २२, २५,, २६ लगायतका वडा बन्द गरिएको छ । यसमध्ये २५ र १८ वडामा संक्रमित भेटिएका छैनन् । जेठ ३२ गतेदेखि असार ३ गतेसम्म आफु अनुकुल समय मिलाएर उनीहरुले वडाका सम्पूर्ण कामकाज बन्द गराएका छन् ।
तर, जनप्रतिनिधिहरुले आफुखुशी वडा बन्द गराउनु गलत भएको जिल्ला प्रशासन कार्यालयले जनाएको छ । सरकारले नै लकडाउन जारी राखेको र मोडालिटी निर्धारण गरेको हुँदा सबै पक्ष मिलेर मापदण्डअनुसार लकडाउन पालना गर्नुपर्ने दायित्व सबैको भएको प्रशासनले जनाएको छ ।
प्रतिक्रिया