गुल्मी । गुल्मीमा पछिल्लो २४ घण्टामा थप ११ जनामा कोरोना संक्रमण पुष्टि भएको छ । यो तथ्यांकसंगै गुल्मीमा कोरोना भाइरस संक्रमितको संख्या ३१ पुगेको छ । संक्रमितमध्ये २ जना उपचारपछि घर फर्किएका छन् भने २ जनाको मृत्यु भएको छ ।
प्रादेशिक प्रयोगशाला रुपन्देहीमा गरिएको परीक्षणमा मुसिकोट नगरपालिकाका ८ जना र रेसुङ्गा नगरपालिकाका ३ जनामा कोरोना पुष्टि भएको हो ।
मुसिकोट नगरपालिका ३०, २९, २८, २१ र २० वर्षका पुरुष तथा २६ वर्षकी महिला र ५ वर्षकी बालिकामा कोरोना पुष्टि भएको गुल्मीका प्रमुख जिल्ला अधिकारी भरतकुमार शर्माले बताए ।
शर्माका अनुसार मुसिकोटबाट रिफर गरेर भैरहवामा उपचारत अर्का एक जनामा पनि कोरोना पुष्टि भएको छ । मुसिकोट नगरपालिकामा मात्र कोरोना संक्रमण पुष्टि हुनेहरुको संख्या ११ पुगेको छ ।
यस्तै रेसुङ्गा नगरपालिकाका वडा नम्बर ३ का ४८ वर्षका पुरुष, वडा नम्बर ६ का १९ वर्षका पुरुष र वडा नम्बर १४ का २५ वर्षका पुरुषमा पनि कोरोना संक्रमण पुष्टि भएको छ ।
जिल्लामा हालसम्म ३७२९ जनाको आरडिटी बिधिबाट परीक्षण गरिएको छ । पीसीआर बिधिबाट परीक्षण गर्न ७०६ जनाको स्वाब संकलन गरिएकोमा ४०५ जनाकोमात्र रिपोर्ट आएको प्रमुख जिल्ला अधिकारी शर्माले बताए ।
बिपद ब्यवस्थापन समिती गुल्मीको संयोजनामा सबै पालिकाहरुले भारत लगायत तेस्रो मुलुकबाट आएकाहरुलाई ५ हजार ३ सय ८ बेडको क्वारेन्टिन तयार गरिएको मा २ हजार ८ सय ९ जना क्वारेन्टिनमा बसेका छन् । जिल्लामा हाल ७७ बेडको आइसोलेसन बेड तयार गरिएको छ ।
प्रतिक्रिया