प्रधानमन्त्री ओलीको कोरोना भविष्यवाणी : साउन-भदौको पहिलो साता उच्च, फागुनसम्म नियन्त्रणमा

काठमाडौं । प्रधानमन्त्री केपी शर्मा ओलीले साउनको अन्तिमतिर र भदौको सुरुमा कोरोना संक्रमण उच्चतम बिन्दूमा पुग्न सक्ने विश्लेषण गरेका छन् ।

राष्ट्रियसभामा सांसदहरुले उठाएको प्रश्नको जवाफ दिँदै बिहीबार प्रधानमन्त्री ओलीले नेपालमा कोरोना भाइरसको संक्रमण चैत्रदेखि बैशाख मन्त्यसम्म भन्दा जेठमा महिनामा बढेको भन्दै साउनको अन्तसम्ममा पिकमा पुग्ने विश्लेषण गरेका हुन् ।

त्यसपछि भने केही समय विस्तारै संक्रमणको ग्राफ ओरालो लाग्ने उनको अनुमान छ । ओलीले भने ‘दशैं तिहार र छठ जस्ता चाडहरु आउँदैछन् । यो चाड सधैँ रमाइलो हुन्थ्यो । यसपटक फेरि संक्रमण बढाउँछ भन्ने अवस्था छ ।

ओलीले भने, ‘हाम्रा आनीबानी र व्यवहारले दशैँ तिहार र छठजस्ता पर्वले कोरोना झन् बढाउँछ भन्ने डर छ ।’ दशैं अघि घटेको ग्राफ चाडबाडमा बढेमा मंसिरमा फेरि चर्किन सक्ने प्रधानमन्त्री ओलीको अनुमान छ ।

आगामी पुष माघसम्ममा मात्र नियन्त्रण गर्नसक्ने प्रधानमन्त्रीको विश्वास छ । तर, यसका लागि संक्रमण रोक्नु र बाहिरबाट आउनेहरुलाई अनिवार्य क्वारेन्टिनमा राख्नु आवश्यक हुने ओलीले बताए ।