बुटवल । सरकारले अत्यावश्यक सेवाबाहेक राति १० देखि बिहान ५ बजेसम्म हिँडडुल गर्न रोक लगाएको छ । रातीको समयमा सिमा पारीबाट नेपाल आएका नागरिकहरु क्वारेन्टाइन लुकिछिपी बस्तीहरुमा प्रवेश गर्ने, क्वारेन्टाइनबाट समेत घर सुत्न जाने जस्ता कार्यहरु हुन थालेपछि रातीको समयलाई हिड्डुल गर्न सरकारले रोक लगाएको हो ।
बन्दाबन्दीको समयमा नागरिकको सुरक्षालाई लक्षित गरी अत्यावश्यक सेवाबाहेक राति १० देखि बिहान ५ बजेसम्म हिँडडुल गर्न रोक लगाएको गृह मन्त्रालयले जनाएको छ ।
सरकारले यही असार १ गतेदेखि लकडाउन खुकुलो बनाएको अवस्थामा लकडाउन उल्लंघन गर्ने गतिबिधि बढेसंगै गृह मन्त्रालयले ‘लकडाउन व्यवस्थित गर्ने सम्बन्धी सुरक्षा मापदण्ड–२०७७’ जारी गरी पैदल र सवारीबाट राति हुने हिँडडुलमा रोक लगाउने आदेश जारी गरेको हो ।
मन्त्रालयले दिउंसामा पनि अत्यावश्यक कामले आवतजावत गर्नुपरेमा वा कार्यस्थलमा २ मिटरको सामाजिक दूरी बनाइ काम गर्नुपर्ने विज्ञप्तिमा उल्लेख गरिएको छ ।
गृह मन्त्रालयले विवाह, व्रतबन्ध, मृत्यु संस्कार लगायत सामाजिक तथा सांस्कृतिक कार्य तथा गतिविधिमा १५ जनाभन्दा बढी सहभागी हुन नपाउने र अनिवार्य सामाजिक दूरी कायम गर्नुपर्ने व्यवस्था गरेको छ ।
वृद्ध मानिस,अशक्त तथा सुत्केरीमहिला र १० वर्ष तलका बालबालिकालाई बाहिर ननिस्कन प्रोत्साहन गर्न पनि गृह मन्त्रालयले सर्वसाधारणलाई आग्रह गरेको छ ।
मालवाहक सवारीसाधनमा चालक र सहचालक मात्रै बस्न पाउने गरि निर्देशन भएको गृहले भनेको छ । असार १ बाट लकडाउन खुकुलो पारिएसंगै समाजमा पुरै लकडाउन खुलेको आभास आउने गरि गतिबिधी भएको थियो ।
प्रतिक्रिया