पर्वतको सहस्रधारामा पहिरो खस्यो, पोखरा बेनी सडक अवरुद्ध, बिद्युत प्रशारण पनि अवरुद्ध

बुटवल। गए रातिदेखि परेको अविरल वर्षाका कारण पर्वत जिल्लाको कुश्मा नगरपालिका–१ सहस्रधारामा पहिरो खस्दा बेनी बागलुङ पर्वत मार्ग अवरुद्ध भएको छ ।

अबिरल परेको पानीका कारण सहस्रधारामा बिहान पहिरो खसेको थियो । पहिरोका कारण कुश्मादेखि बागलुङ र बेनी हुँदै मुस्ताङसम्म जाने लोकमार्ग अवरुद्ध बनेको छ । पर्वतका प्रमुख जिल्ला अधिकारी शम्भु प्रसाद रेग्मीका अनुसार अहिले पहिरो हटाएर लोकमार्ग सञ्चालन गर्ने काम भईरहेको छ ।

यसैगरी पहिरोका कारण कुश्मा बागलुङ ३३ केभि लाइन पनि अवरुद्ध बनेको छ । पहिरोले प्रसारण लाइनमा क्षति पुराउँदा विद्युत् सेवा बागलुङ र म्याग्दी जिल्लामा अवरुद्ध बनेको हो । विद्युत् प्रसारणलाई सुचारु गर्नका लागि काम भइरहेको विद्युत् प्राधिकरण कार्यालयले जनाएको छ । पहिरोका कारण अन्य मानवीय र भौतिक क्षति भने नभएको प्रहरीले जनाएको छ ।