कोरोना प्रभावित धारामा आउने भन्दै छोडेको करेन्ट लागेर एकको मृत्यु

डोटी । डोटीको आदर्श गाउँपालिका-७ मा एक जना महिलाको करेन्ट लागेर मृत्यु भएको छ ।

कोरोना प्रभावित व्यक्ति धारामा नुहाउन आउने भन्दै स्थानीय १९ वर्षीय सुर्ज किमाडीले पानीको ट्याङ्कीमा बिजुलीको तार हालेका स्थानीले बताएका छन् । आदर्श–७ नवाघरकी मानबहादुर बाघकी २६ वर्षीय श्रीमती तुल्सी बाघ धारामा नुहाउन गएकी थिइन् ।

सोही बेलामा करेन्ट लागेर उनको मृत्यु भएको स्थानीय गणेश बिष्टले जानकारी दिनुभयो । सार्वजनिक धारामा भारतबाट आएका कोरोना संक्रमित पनि पानी भर्न आउने गरेको भन्दै करेन्ट छाडेको किमाडीले स्वीकार गरेका छन् । किमाडीलाई इलाका प्रहरी कार्यालयले नियन्त्रणमा लिएर राखेको छ ।

शव अहिले जिल्ला अस्पताल डोटी ल्याउने तयारी भइरहेको जिल्ला प्रहरी कार्यालयले जनाएको छ । घरबाट बिजुली र ग्याबिन जालीको तार जोडेर लगाएपछि धारामा करेन्ट प्रवाह भएको थियो ।

मृतक महिला बाल विकासमा सहयोगी कार्यकर्ताको रुपमा समेत क्रियाशील थिइन् ।