संखुवासभा । ७ संखुवासभाको मकालु गाउँपालिका वाड नं.२ र ५ मा पर्ने बोयामफेदी भन्ने ठाउँबाट पहिरो झरेर अरुण नदीको केही भाग थुनिएको छ ।
केही दिन अघिदेखि परेको अविरल बर्षाको कारण गएराति गएको पहिरोले आंशिक रुपमा अरुण नदी थुनिएको जिल्ला प्रहरी कार्यालय संखुवासभाका प्रहरी नायव उपरीक्षक नवराज मल्लले बताए ।
मल्लका अनुसार, गएराति गएको पहिरोले स्थानीय ललितबहादुर राई र उनको छोरा जयप्रकाश राईको ७ जनाको परिवार विस्थापित भएको बताए ।
विस्थापित परिवारलाई घरबाट केही टाढाका समथर भूभागमा प्रहरी र गाउँलेहरुले उद्धार गरेको छ । ललितबहादुरको घरमुनीबाट करिब ६ सय मिटर माथिबाट झरेको पहिरोले अरुण नदी थुनिदा करिब ३ सय मिटर पानी जमेर ड्याम बनेको छ ।
ललितबहादुरका साथै २ नम्बर वडा सदस्य हिरालाल राई र बिर्खबहादुर राईको गोठ समेत उच्च जोखिममा परेको छ । पहिरोका कारण स्थानीयहरु त्रसित बनेका छन् । गयराती देखी गएको अझै पनि रोकिएको छैन् । पहिरो झरिरहेको प्रहरीको भनाइ छ । घटनाको सम्पूर्ण विवरण आइ नसकेको जिल्ला प्रहरी कार्यालय संखुवासभाका प्रनाउ मल्लको भनाइ छ ।
अरुण थुनिएपछि बहुचर्चित ९०० मेगावाटको अरुण तेस्रो आयोजनाको ड्यामसाइड फ्याक्सिन्दा र पुखुवा आसपास क्षेत्रहरु समेत जोखिममा परेका छन् । त्यसका साथै अरुण नदीसंगै हेलुवाबेसी, चेवाबेसी, मनकामना लगायतका क्षेत्रका नदी आसपासका स्थानीयहरुमा जोखिम बढेको छ । स्थानीय प्रशासनले सर्तक र सचेत रहन समेत आग्रह गरेको छ । उक्त क्षेत्र गत वर्ष समेत ठूलो पहिरोले धेरै ठूलो क्षति पु¥याएको थियो ।
प्रतिक्रिया